Եվրոպան ու ԱՄՆ-ն միմյանց կարիքն ունեն, սակայն վստահություն այլևս չկա․ Politico

Այս տարվա Մյունխենի անվտանգության համաժողովն ավելի մեղմ էր, քան անցյալ տարվանը, սակայն Դոնալդ Թրամփը հիմնարար կերպով փոխել է տրանսատլանտյան կապերը․ գրում է Politico-ն։

Ինչպես նշվում է, եվրոպացի և ամերիկացի առաջնորդները 3 օր համագործակցության խոստում են տվել միմյանց, սակայն հարաբերություններում առկա ճաքերը դեռևս երևում են։

Միացյալ Նահանգները պակաս մարտական էր, քան մեկ տարի առաջ։ Սակայն հավաքը ցույց տվեց, որ չնայած դաշինքը շարունակում է գործել, Ատլանտյան օվկիանոսի երկու կողմերը տասնամյակներ շարունակ կապող հին կարգը քանդվել է։ Չկա կոնսենսուս այն մասին, թե ինչպես կարող են հարաբերություններն առաջ շարժվել՝ հաշվի առնելով Թրամփի վարչակազմի կողմից համակարգին հասցվող պարբերական սեյսմիկ ցնցումները։ Մայրցամաքը վարչակազմի առաջնահերթությունների ցանկում իջել է երրորդ տեղն՝ Արևմտյան կիսագնդից և Չինաստանից հետո։ ԱՄՆ-ի կողմից Ուկրաինային տրամադրվող նոր օգնությունը գրեթե զրոյացել է, իսկ Եվրոպան անընդհատ հարձակումների է ենթարկվում խոսքի ազատության և թվային կարգավորման հարցում։

Միևնույն ժամանակ՝ մայրցամաքը պայքարում է MAGA-ի կողմից աջակցվող ծայրահեղ աջ կուսակցությունների վերելքի և իր շեմին գտնվող թուլացած, բայց վտանգավոր Ռուսաստանի դեմ, որին Թրամփը պնդում է վերադարձնել համաշխարհային կարգ։

«Ես չեմ կարծում, որ մենք կշարունակենք աշխատել սովորականի պես», – Politico-ի հետ զրույցում նշել է Լատվիայի վարչապետ Էվիկա Սիլինան, որը գտնվում է հնարավոր ռուսական հարձակման առաջնագծում, և որի անվտանգությունը կախված է դաշնակիցներից։

Եվրոպացի գործադիր տնօրեններից մեկը նշել է, որ «մի սերունդ» կպահանջվի վերջին մեկ տարվա ընթացքում կորցրած վստահությունը վերականգնելու համար։

 «Ամերիկյան արտաքին քաղաքականությունը փոխվել է», – Politico-ին հայտնել է Ֆինլանդիայի նախագահ և Թրամփի գոլֆի ընկեր Ալեքսանդր Ստուբը։

Եվրոպացիների համար նաև աննկատ չի մնացել, որ ԱՄՆ պետքարտուղար Մարկո Ռուբիոն իր ելույթի ժամանակ հազիվ է հիշատակել Ռուսաստանին և Ուկրաինային։