Թուրքիայի ՊՆ-ն մեկնաբանել է տեղեկությունները, թե թուրքական բանակը կարող է մտնել Իրան
Թուրքիայի ազգային պաշտպանության նախարարությունը մեկնաբանել է վերջին օրերին շրջանառվող հաղորդագրություններն այն մասին, թե թուրքական բանակն «անվտանգության նկատառումներով» պլանավորում է մուտք գործել Իրանի տարածք՝ Իրանի վրա ԱՄՆ-ի հարձակման դեպքում։
Ինչպես հայտնում է ԱՊԱ-ի թուրքական ծառայությունը, նախարարությունը հայտարարել է, որ այդ պնդումները չեն համապատասխանում իրականությանը:
Գերատեսչությունն ընդգծել է, որ Թուրքիան շարունակում է ջանքեր գործադրել տարածաշրջանում խաղաղություն և կայունություն ապահովելու համար:
«Թուրքիան աջակցում է տարածաշրջանում բոլոր հակամարտությունների խաղաղ կարգավորմանը և շարունակում է ջանքեր գործադրել կայունություն ապահովելու համար։ Ձեռնարկվում են անհրաժեշտ միջոցներ՝ հնարավոր ռիսկերին հակազդելու համար՝ համապատասխան պետական մարմինների հետ համակարգված։ Որոշ լրատվամիջոցներում և սոցիալական ցանցերում շրջանառվող պնդումները, թե «ԱՄՆ-ի կողմից Իրանի վրա հարձակման դեպքում Թուրքիան նույնպես պլանավորում է մուտք գործել Իրանի տարածք՝ անվտանգության նկատառումներով», չեն արտացոլում իրականությունը»,- նշվում է հայտարարության մեջ։
