ԱՄՆ-ն և Իսրայելն օգտագործել են Իրանի հետ վերջին բանակցություններն Իրանի ղեկավարությանը կեղծ անվտանգության զգացում հաղորդելու համար․ Axios
Միացյալ Նահանգներն Իրանի հետ վերջին բանակցություններն օգտագործել է Իսլամական Հանրապետության ղեկավարությանը և նրա գերագույն առաջնորդ Ալի Խամենեիին կեղծ անվտանգության զգացում հաղորդելու համար․ գրում է Axios-ը՝ հղում անելով աղբյուրներին։
Իսրայելական հետախուզության աղբյուրը Axios-ին հայտնել է, որ «ԱՄՆ-ն և Իսրայելը ցանկանում էին ցույց տալ, որ անխուսափելի հարված չի նախատեսվում, որպեսզի Խամենեին և մյուսներն իրենց անվտանգ զգան»։ Միևնույն ժամանակ՝ երկու երկրների ռազմական ղեկավարները վերջին շաբաթվա ընթացքում մտահոգված էին, որ Խամենեին իր նստավայրից կտեղափոխվի ստորգետնյա բունկեր։
Մի քանի ամերիկացի և իսրայելցի պաշտոնյաների խոսքով՝ ԱՄՆ-ն իսկապես հանձնառու է բանակցություններին։ Նրանց պնդմամբ՝ Վաշինգտոնը կարող էր հրաժարվել հարվածից, եթե երկխոսության միջոցով զգալի առաջընթաց ձեռք բերվեր։
Պորտալը հայտնում է, որ ԱՄՆ-ն և Իսրայելը սկզբում պլանավորել էին հարձակվել Իրանի վրա մեկ շաբաթ շուտ, սակայն, ըստ ԱՄՆ-ի և Իսրայելի բարձրաստիճան պաշտոնյաների, առաջին հարվածը հետաձգվել էր օպերատիվ և հետախուզական պատճառներով։
ԱՄՆ-ի և Իսրայելի պաշտոնյաները նշել են, որ հիմնական պատճառներից մեկը տարածաշրջանում վատ եղանակն էր։
Իսրայելի երկրորդ պաշտոնյայի խոսքով՝ հետաձգումը հիմնականում ԱՄՆ կողմից էր և կապված էր Իսրայելի պաշտպանության ուժերի հետ ավելի լավ համակարգման անհրաժեշտության հետ։
Իսրայելի բարձրաստիճան պաշտոնյայի խոսքով՝ առաջին հարվածը նախատեսված էր Իրանի գերագույն առաջնորդ Ալի Խամենեիի և նրա որդիների, ինչպես նաև իրանցի բարձրաստիճան պաշտոնյաների դեմ, ովքեր պարբերաբար հանդիպում էին, այդ թվում՝ ամեն շաբաթ անցկացվող կանոնավոր հանդիպման ընթացքում։
ԱՄՆ-ում Իսրայելի դեսպան Եչիել Լեյտերը պնդում է, որ թիրախավորվել են երկու առանձին հանդիպումներ, որոնք երկուսն էլ կենտրոնացած էին Իրանում հավանական բողոքի ալիքին արձագանքելու վրա։
