Իրանի դեմ գործողությունները կարող են տևել առնվազն 100 օր․ Politico
ԱՄՆ Պետնախարարությունը փորձում է տարհանել Մերձավոր Արևելքում մնացած իր քաղաքացիներին, իսկ Պենտագոնն շտապում է ավելացնել Իրանի դեմ գործողությունների համար հետախուզական տվյալներ հավաքող ամերիկյան զորքի թիվը՝ նշաններ, որ Թրամփի վարչակազմը լիովին պատրաստ չէր այն ավելի մեծ պատերազմին, որի առջև այժմ կանգնած է․ գրում է Politico-ն։
Politico-ի աղբյուրի համաձայն՝ շատերը քննադատում են ԱՄՆ կառավարությանն՝ ամերիկացիներին Մերձավոր Արևելքից հեռանալու մասին ժամանակին չզգուշացնելու համար։ Այս քննադատությունների ֆոնին՝ Պետքարտուղարությունը լրացուցիչ աշխատակիցներ է ուղարկում Աթենք՝ ԱՄՆ քաղաքացիներին օգնելու համար։
Միևնույն ժամանակ, ԱՄՆ Կենտրոնական հրամանատարությունը խնդրել է Պենտագոնին ռազմական հետախուզության ավելի շատ սպաներ ուղարկել Ֆլորիդայում գտնվող իր գլխավոր շտաբ՝ Իրանի դեմ գործողություններին առնվազն 100 օր, նույնիսկ մինչև սեպտեմբեր, աջակցելու համար։
Սա Իրանի դեմ պատերազմի համար լրացուցիչ հետախուզական անձնակազմ ներգրավելու վարչակազմի առաջին կոչն է, և նշան է, որ ԱՄՆ-ի գործողությունները կարող են տևել նախագահ Դոնալդ Թրամփի սահմանած չորսշաբաթյա ժամանակացույցից շատ ավելի երկար։
Նշվում է, որ ԱՄՆ վարչակազմի՝ ռեսուրսներ ավելացնելու շտապողականությունն ընդգծում է, թե ինչպես Թրամփի թիմը լիովին չէր կանխատեսել շաբաթ Իրանի դեմ Իսրայելի հետ համատեղ սկսված պատերազմի լայնածավալ հետևանքները։
