Պատերազմի ֆոնին Ասիայի մեծահարուստները ցանկանում են Դուբայի ակտիվները տեղափոխել այլ երկրներ
Անցյալ շաբաթ Դուբայի վրա իրանական առաջին հրթիռային և անօդաչու սարքերի հարվածներից կարճ ժամանակ անց այնտեղ բնակվող 2 հնդիկ ձեռնարկատեր փորձել է իր տեղական բանկային հաշիվներից ավելի քան 100․000-ական դոլար տեղափոխել Սինգապուր՝ ռիսկերից խուսափելու համար․ գրում է Reuters գործակալությունը։
Հարվածներից առաջացած տեխնոլոգիական խնդիրներն սկզբում խափանել են նրանց ծրագրերը։ Նրանցից մեկը նշել է, որ հետագայում իրեն հաջողվել է գումարը փոխանցել Սինգապուրի իր բանկային հաշվին՝ Էմիրություններում գտնվող մեկ այլ բանկի միջոցով։
Նշվում է, որ տասնյակ այլ հարուստ ասիացիներ նմանատիպ քայլեր են ձեռնարկում՝ Դուբայում պահվող իրենց ակտիվները Սինգապուրի և Հոնկոնգի ֆինանսական կենտրոններ տեղափոխելու համար։
Բարենպաստ բիզնես և ներդրումային քաղաքականության շնորհիվ վերջին տարիներին Դուբայը դարձել էր ասիացի, հիմնականում՝ չինացի ձեռնարկատերերի՝ իրենց ունեցվածքը պահելու համար նախընտրելի վայր։ Իրավիճակն այս առումով, կարծես, փոխվել է՝ Մերձավոր Արևելքում հակամարտության բռնկման ֆոնին։
