Ռուսաստանը միջոցներ կձեռնարկի, եթե Ֆինլանդիան միջուկային զենք տեղակայի իր տարածքում
Կրեմլը հայտարարել է, որ միջուկային զենքի տեղակայման արգելքը վերացնելու Ֆինլանդիայի ծրագիրը լարվածություն է առաջացրել Եվրոպայում և պոտենցիալ սպառնալիք է ներկայացնում ՌԴ-ի համար․ գրում է Reuters գործակալությունը։
Հինգշաբթի Ֆինլանդիան հայտարարել է, որ պլանավորում է վերացնել իր տարածքում միջուկային զենք տեղակայելու մասին երկարատև արգելքը։
«Սա հայտարարություն է, որը սրում է լարվածությունը եվրոպական մայրցամաքում։ Այս հայտարարությունը սրում է Ֆինլանդիայի խոցելիությունը, խոցելիություն, որն առաջացել է Ֆինլանդիայի իշխանությունների գործողություններից։ Փաստացի իր տարածքում միջուկային զենք տեղակայելով՝ Ֆինլանդիան սպառնում է մեզ։ Եվ եթե Ֆինլանդիան սպառնում է մեզ, մենք համապատասխան միջոցներ ենք ձեռնարկում»,- լրագրողներին ասել է Կրեմլի պաշտոնական ներկայացուցիչ Դմիտրի Պեսկովը։
Ֆինլանդիան, որը Ռուսաստանի հետ ունի երկար սահման, չեզոքություն է պահպանել Սառը պատերազմի ժամանակ, սակայն 2023 թվականին միացել է ՆԱՏՕ-ին՝ ի պատասխան Ուկրաինայի դեմ Ռուսաստանի պատերազմի։
