Նախիջևանի սահմանադրությունից հանվել են Մոսկվայի և Կարսի պայմանագրերի հղումները․ որոշումները կկայացվեն Ալիևի վերահսկողությամբ
Ադրբեջանի նախագահը հաստատել է Նախիջևանի Ինքնավար Հանրապետության սահմանադրության փոփոխությունները, որոնցով հանվել են 1921 թվականի Մոսկվայի և Կարսի միջազգային պայմանագրերի հղումները. գրում է ТАСС-ը։
Փոփոխություններից առաջ Նախիջևանի սահմանադրության նախաբանում նշվում էր, որ շրջանի ինքնավարության հիմքերը դրվել են միջազգային պայմանագրերով՝ 1921 թվականի մարտի 16-ի Մոսկվայի պայմանագրով և 1921 թվականի հոկտեմբերի 13-ի Կարսի պայմանագրով: Այս պայմանագրերը հաստատել են, որ Նախիջևանն Ադրբեջանի անբաժանելի մասն է, և պարզաբանել են նրա տարածքային սահմանները։
Նոր նախաբանում դուրս են բերվել Մոսկվայի և Կարսի պայմանագրերի մասին հիշատակող պարբերությունները, և ներառված է հայտարարություն, որ «Նախիջևանի Ինքնավար Հանրապետությունն Ադրբեջանի Հանրապետության անբաժանելի մասն է»։
Սահմանադրությանն ավելացվել է նոր հոդված՝ «Նախիջևանի Ինքնավար Հանրապետությունում Ադրբեջանի Հանրապետության նախագահի լիազոր ներկայացուցչության մասին»: Այս հոդվածի համաձայն՝ լիազոր ներկայացուցչությունը գործադիր մարմին է, որը կատարում է Ադրբեջանի նախագահի կողմից Նախիջևանում սահմանված խնդիրները: Այս մարմինը կգլխավորի նախագահի լիազոր ներկայացուցիչը, որին նշանակում և ազատում է պետության ղեկավարը և անմիջականորեն հաշվետու է նրան։
Սահմանադրությունից հանվել է նաև 5-րդ հոդվածը, որը սահմանում է ինքնավար հանրապետության բարձրագույն պաշտոնատար անձին, որը նախկինում Նախիջևանի խորհրդարանի նախագահն էր: Փոփոխությունների համաձայն՝ ինքնավարության նախարարների կաբինետն այլևս չի ենթարկվում խորհրդարանին և կորոշի իր ընթացակարգերը՝ խորհրդակցելով Ադրբեջանի նախագահի հետ։
