Մակրոնը կոչ է արել Փեզեշքիանին «անհապաղ դադարեցնել անընդունելի հարձակումները» տարածաշրջանի երկրների դեմ
Ֆրանսիայի նախագահ Էմանուել Մակրոնը հայտարարել է, որ անվտանգության նոր համակարգը պետք է ներառի Իրանի ապամիջուկայնացման երաշխիքներ։
Ֆրանսիայի առաջնորդն այս մասին գրել է սոցիալական ցանցերում՝ իր իրանցի գործընկեր Մասուդ Փեզեշքիանի հետ հեռախոսազրույցից հետո։
Մակրոնը հայտարարել է, որ կոչ է արել Փեզեշքիանին «անհապաղ դադարեցնել անընդունելի հարձակումները» տարածաշրջանի երկրների դեմ։
Ֆրանսիայի նախագահը նաև նշել է, որ սրացումն ամբողջ տարածաշրջանը քաոսի մեջ է գցում և լուրջ հետևանքներ ունի, որոնց համար «վճարում» են Իրանի ժողովուրդը և տարածաշրջանի երկրները։
«Միայն նոր քաղաքական շրջանակը և անվտանգության համակարգը կապահովեն խաղաղություն բոլորի համար։ Նման համակարգը պետք է երաշխավորի, որ Իրանը երբեք միջուկային զենք չի ունենա, կվերացնի իր բալիստիկ հրթիռային ծրագրից բխող սպառնալիքները և կհրաժարվի տարածաշրջանային և միջազգային կայունությունը խաթարող քայլերից»,- հայտարարել է Մակրոնը։
Ավելի վաղ հայտնի էր դարձել, որ իր իրանցի գործընկերոջ հետ հեռախոսազրույցի ժամանակ Ֆրանսիայի նախագահն ընդգծել է պատերազմը դադարեցնելու և տարածաշրջանում իրավիճակը թուլացնելու անհրաժեշտությունը։
Մակրոնը մտահոգություն է հայտնել տարածաշրջանում իրավիճակի սրման, Հորմուզի նեղուցում տիրող իրավիճակի և «Հեզբոլլահ»-ի ու Իսրայելի միջև շարունակվող հակամարտության վերաբերյալ։
Իր հերթին, Փեզեշքիանն իր գործընկերոջը տեղեկացրել է ԱՄՆ-ի և Իսրայելի «անօրինական ագրեսիայի» մասշտաբների մասին։
«Իրանի ժողովուրդը, կառավարությունը և զինված ուժերը երբեք լարվածության և հակամարտության չեն ձգտել, բայց մենք կասկած չունենք ագրեսորներին դիմակայելու և մեր տարածքային ամբողջականությունն ու ազգային անվտանգությունը վճռականորեն, օրինական կերպով պաշտպանելու անհրաժեշտության մեջ»,- նշել է Իրանի նախագահը։
