Հնդկաստանը հույս ունի, որ Իրանի հետ բանակցությունները կհեշտացնեն Հորմուզի նեղուցով իր նավերի անցանելիությունը
Հնդկաստանի արտաքին գործերի նախարար Սուբրամանյամ Ջայշանկարը հայտնել է, որ Իրանի հետ բանակցությունները սկսում են մեղմել երկրի նավերի համար Հորմուզի նեղուցով նավագնացության խափանումները։
«Այս պահին ես զբաղված եմ նրանց հետ բանակցություններով, և իմ զրույցները որոշակի արդյունք են տվել»,- նշել է նա Financial Times-ի հետ զրույցում:
Սակայն նախարարը հավելել է, որ չկա որևէ «ընդհանուր պայմանավորվածություն» բոլոր հնդկական նավերի համար նեղ ջրային ուղով անցնելու համար, որը կենսական նշանակություն ունի նավթի փոխադրման համար։
Շաբաթ օրը նեղուցով անցել է Հնդկաստանի դրոշի ներքո նավարկող 2 նավ՝ Դելիի և Թեհրանի միջև քննարկումներից հետո։ Հնդկաստանի դրոշի ներքո նավարկող 22 նավ դեռևս սպասում է նեղուցով անցնելու թույլտվության։
Ջայշանկարը Financial Times-ին հայտնել է, որ Հնդկաստանի և Իրանի միջև քննարկումները շարունակվում են։ Վերլուծաբանները նշում են, որ ճգնաժամի զարգացմանը զուգընթաց՝ Հնդկաստանը գտնվում է նուրբ դիվանագիտական դիրքում։ Դելին պահպանում է սերտ կապեր Իսրայելի հետ և ունի աճող ռազմավարական համագործակցություն ԱՄՆ-ի հետ, բայց նաև ունի երկարատև քաղաքական և տնտեսական կապեր Իրանի հետ։ Հնդկաստանը երկխոսության և տարածաշրջանում առևտրային նավագնացության անվտանգության պահպանման կոչ է արել:
