Վատիկանը նոր ուղեցույցներով թույլատրում է կենդանիների օրգանների փոխպատվաստումը մարդկանց
Կաթոլիկ եկեղեցին դեմ չէ մարդկանց փոխպատվաստման համար կենդանիների օրգանների, հյուսվածքների կամ բջիջների օգտագործմանը․ գրում է Euronews-ը։
Նշվում է, սակայն, որ գլխավոր պայմանն այն է, որ բժիշկները հետևեն պատշաճ էթիկական չափանիշներին։
Այս առնչությամբ Վատիկանը հրապարակել է փաստաթուղթ, որում բացատրվում է, թե նման դեպքերում բժիշկներն ինչ պետք է հաշվի առնեն բժշկական և էթիկական տեսանկյունից։
«Կաթոլիկ ուսմունքը կրոնական կամ ծիսական հիմքերով որևէ արգելք չի նախատեսում մարդկանց փոխպատվաստման նպատակով որևէ կենդանու՝ որպես օրգանների, հյուսվածքների կամ բջիջների աղբյուր օգտագործելու համար», – ասվում է Վատիկանի հրապարակած փաստաթղթում։
Վատիկանը նշում է, որ չնայած օրգանների փոխպատվաստումն ավելի ու ավելի մեծ տարածում է գտնում աշխարհում, բավարար քանակությամբ մարդկային դոնորներ չկան։ Քսենոտրանսպլանտացիան՝ կենդանիների օրգանների օգտագործումը մարդկանց համար, կարող է լուծել այս խնդիրը՝ ապահովելով օրգանների, հյուսվածքների և բջիջների շատ ավելի մեծ քանակ։
