Թրամփը Meta-ի, Oracle-ի և Nvidia-ի ղեկավարներին կնշանակի AI հարցերով հանձնաժողովի անդամներ

ԱՄՆ նախագահ Դոնալդ Թրամփը նախատեսում է Meta Platforms-ի գործադիր տնօրեն Մարկ Ցուկերբերգին, Oracle-ի գործադիր տնօրեն Լարի Էլիսոնին և Nvidia-ի գործադիր տնօրեն Ջենսեն Հուանգին նշանակել արհեստական բանականության քաղաքականությամբ զբաղվող հանձնաժողովի անդամ․ գրում է Reuters գործակալությունը՝ հղում անելով The Wall Street Journal-ին։

Անցյալ տարվա հունվարին հրապարակված գործադիր հրամանագրի համաձայն՝ Նախագահի գիտության և տեխնոլոգիաների հարցերով խորհրդականների խորհուրդը (PCAST) կարող է ներառել 24 մարդ։

Հաղորդվում է, որ ԱՄՆ նախագահը չորեքշաբթի կհայտարարի ոլորտից ընտրված 13 անդամներից կազմված նախնական խմբի մասին, որի կազմում կլինի նաև Google-ի համահիմնադիր Սերգեյ Բրինը։

Նշվում է, որ խորհուրդը կօգնի ԱՄՆ-ին որոշել՝ ինչպես արձագանքել արհեստական ​​բանականության ոլորտում համաշխարհային մրցակցությանը, մասնավորապես՝ Չինաստանի հետ, որտեղ կառավարության աջակցությունը ստացող ընկերություններն արագ առաջընթաց են գրանցում AI ոլորտում։