Ադրբեջանցի լրագրողներն ասես հրամանով դադարել են մասնակցել իմ ճեպազրույցներին․ Զախարովա
Ադրբեջանցի լրագրողներն ասես հրամանով դադարել են մասնակցել իմ ճեպազրույցներին․ հայտարարել է ՌԴ ԱԳՆ ներկայացուցիչ Մարիա Զախարովան։
«Ադրբեջանցի լրագրողները, ինձ անհայտ պատճառներով, ասես հրամանով, հույս ունեմ՝ դա հրաման չէ, դադարել են այցելել ճեպազրույցներին․․․ Հույս ունեմ՝ նրանց ոչ ոք չի արգելել դա անել», – նշել է Զախարովան՝ անդրադառնալով ԶԼՄ-ներում տարածված տեղեկությանը, թե նախորդ ճեպազրույցի ժամանակ ՌԴ ԱԳՆ ներկայացուցիչն անհարգալից վերաբերմունք է ցուցաբերել Ադրբեջանի նախկին առաջնորդ Հեյդար Ալիևի նկատմամբ։
Հիշեցնենք, որ օրեր առաջ Ադրբեջանի ԱԳՆ խոսնակ Այհան Հաջիզադեն հայտարարել էր, որ ադրբեջանական կողմը սպասում է պարզաբանման Ռուսաստանի ԱԳՆ խոսնակ Մարիա Զախարովայի ճեպազրույցի ժամանակ արված հայտարարության առնչությամբ։
«Ազգային առաջնորդ Հեյդար Ալիևի անունը նման համատեքստում հիշատակելը նրա ժառանգության և Ադրբեջանի ժողովրդի նկատմամբ անհարգալից վերաբերմունքի նշան է, և չի համապատասխանում պաշտոնական ներկայացուցչից ակնկալվող չափանիշներին», – նշել էր Հաջիզադեն։
Հիշեցնենք, որ ճեպազրույցի ժամանակ լրագրողը մեջբերել էր Նիկոլ Փաշինյանի հայտարարությունը, թե հանրապետության մի շարք հոգևորականներ, որոնցից մի քանիսը «ԽՍՀՄ ՊԱԿ-ի գործակալներ էին», «փորձում են զոհաբերել Հայաստանի անկախությունը երրորդ երկրների շահերի համար»։ Ինչին ի պատասխան Զախարովան պատասխանել էր, որ չի հասկանում՝ ում մասին է խոսում Փաշինյանը, երբ ասում է «ՊԱԿ գործակալներ»՝ միգուցե Հեյդար Ալիևի՞։
