Պենտագոնը պատրաստվում է Իրանին հասցնել «վերջնական հարված»՝ դիտարկելով 4 տարբերակ․ Axios
Պենտագոնը մշակում է Իրանին «վերջնական հարված» հասցնելու տարբերակներ, որոնք կարող են ներառել ցամաքային ուժերի կիրառում և լայնածավալ ռմբակոծությունների արշավ․գրում է Axios-ը՝ հղում անելով երկու ամերիկացի պաշտոնյաների և երկու տեղյակ աղբյուրների։
Դրամատիկ ռազմական էսկալացիան ավելի հավանական կլինի, եթե դիվանագիտական բանակցություններում առաջընթաց չգրանցվի, և, մասնավորապես, եթե Հորմուզի նեղուցը մնա փակ։ Որոշ ամերիկացի պաշտոնյաներ կարծում են, որ մարտական գործողություններն ավարտելու համար ուժի ջախջախիչ ցուցադրությունը կստեղծի ավելի մեծ լծակներ խաղաղության շուրջ բանակցություններում կամ պարզապես Թրամփին կտա ինչ-որ բան իր հաղթանակի մասին հայտարարելու համար։
Axios-ի հետ զրույցում պաշտոնյաները և ներքին քննարկումներին ծանոթ աղբյուրները նկարագրում են «վերջնական հարվածի» 4 տարբերակ, որոնցից Թրամփը կարող է ընտրել.
- Իրանի նավթի արտահանման հիմնական հանգույց՝ Խարգ կղզի ներխուժումը կամ շրջափակումը։
- Լարակ կղզի ներխուժումը, որն օգնում է Իրանին ամրապնդել իր վերահսկողությունը Հորմուզի նեղուցի նկատմամբ։
- Աբու Մուսա ռազմավարական կղզու և երկու փոքր կղզիների գրավում, որոնք գտնվում են նեղուցի արևմտյան մուտքի մոտ։
- Հորմուզի նեղուցի արևելյան կողմում իրանական նավթ արտահանող նավերի արգելափակում կամ գրավում։
ԱՄՆ զինված ուժերը նաև պատրաստել է Իրանի խորքում ցամաքային գործողությունների ծրագրեր։
Թրամփը դեռևս որոշում չի կայացրել այս սցենարներից որևէ մեկի վերաբերյալ, և Սպիտակ տան պաշտոնյաները ցանկացած հնարավոր ցամաքային գործողություն որակում են որպես «հիպոթետիկ»։
Սակայն աղբյուրները նշում են, որ նա պատրաստ է սրել իրավիճակը, եթե Իրանի հետ բանակցությունները շուտով իրական արդյունքներ չտան։ Թրամփը կարող է նախ իրականացնել իր սպառնալիքը՝ ռմբակոծել Իրանի էլեկտրակայաններն ու էներգետիկ օբյեկտները, որի համար Թեհրանը սպառնացել է զանգվածային հակահարված տալ Պարսից ծոցում։
ԱՄՆ-ի և Իրանի միջև բանակցություններ սկսելու ջանքերին մասնակցող աղբյուրը հայտնել է, որ Պակիստանը, Եգիպտոսը և Թուրքիան դեռևս փորձում են կազմակերպել կողմերի միջև հանդիպում։
Աղբյուրը նշել է, որ չնայած Իրանը մերժել է ԱՄՆ-ի պահանջների սկզբնական ցանկը, այն չի բացառել բանակցությունները։
«Սակայն խնդիրն անվստահությունն է։ Իսլամական հեղափոխության պահապանների կորպուսի հրամանատարները շատ կասկածամիտ են»,- նշել է աղբյուրը։
