Քանի դեռ Թուրքիայում իշխանության ղեկին Էրդողանն է, մեր դեսպանը չի վերադառնա Անկարա. Իսրայելի ԱԳ նախարար
Իսրայելի դեսպանը չի վերադառնա Թուրքիա, քանի դեռ երկրում իշխանության ղեկին Ռեջեփ Թայիփ Էրդողանն է, հայտարարել է Իսրայելի արտգործնախարար Էլի Քոհենը։
«Քանի դեռ Էրդողանը Թուրքիայում իշխանության ղեկին է, մեր դեսպանը չի վերադառնա Անկարա»,- գրել է նախարարը X-ում:
Ինչպես բացատրել է Քոհենը կից տեսանյութում, Իսրայելի դեսպանին հետ կանչելը «ճիշտ» և «արդարացված» որոշում էր:
Դեկտեմբերի 27-ին Էրդողանը Թուրքիայի մայրաքաղաքում ելույթի ժամանակ Իսրայելի վարչապետ Բենիամին Նեթանյահուին համեմատել էր նացիսռական Գերմանիայի առաջնորդ Ադոլֆ Հիտլերի հետ։
«Նեթանյահուի գործողությունները տարբերվու՞մ են Հիտլերի գործողություններից: Նա ավելի հարուստ է, քան Հիտլերը: Իսրայելն աջակցություն է ստանում Արևմուտքից, բոլոր տեսակի աջակցությունը գալիս է Ամերիկայից»,- ասել էր Էրդողանը։
Նեթանյահուն ասել է, որ Էրդողանը «վերջինն է, ով կարող է բարոյական խրատ կարդալ մեզ»՝ երկրում քրդերի էթնիկ զտումների և լրագրողների նկատմամբ հետապնդումների ֆոնին:
