Ռուսաստանում Թաֆթսի համալսարանն ու Ֆլետչերի դպրոցն «անցանկալի կազմակերպություն» են ճանաչվել
ՌԴ գլխավոր դատախազությունը Թաֆթսի համալսարանը ճանաչել է որպես «անցանկալի կազմակերպություն» Ռուսաստանում․ հայտնում է «Дождь»-ը։
Նման կարգավիճակ է տրվել նաև Ֆլետչերի իրավունքի և դիվանագիտության դպրոցին։
«Այս համալսարանն ու դպրոցը հետազոտական կենտրոններից վերածվել են հակառուսական քարոզչության գործիքների։ Կիևի ռեժիմին բացահայտորեն համերաշխություն հայտնելով՝ այս հաստատությունները միտումնավոր անցկացնում են տարբեր միջոցառումներ, որոնք տարածում են Ռուսաստանի մասին խեղաթյուրված և ոչ հավաստի տեղեկություններ», – հայտնել են Գլխավոր դատախազությունից։
Նշվում է նաև, որ այս կրթական հաստատություններն աջակցում են «ԼԳԲՏ համայնքին»՝ ռուսների ավանդական և բարոյական արժեքները խաթարելու համար։
