Իրանը չի հանդուրժի պատերազմի, բանակցությունների և հրադադարի արատավոր շրջանը․ Իրանի ԱԳՆ ներկայացուցիչ
Իրանի արտաքին գործերի նախարարության ներկայացուցիչ Էսմայիլ Բաղային հայտարարություն է տարածել՝ ի պատասխան Թրամփի ելույթի, որում ԱՄՆ նախագահն զգուշացրել է, որ Իրանը պետք է համաձայնի գործարք կնքել երկու-երեք շաբաթվա ընթացքում, հակառակ դեպքում ԱՄՆ-ն կհարվածի Իրանի բոլոր էլեկտրակայաններին․ գրում է Al Jazeera-ն։
«Մենք չենք հանդուրժի պատերազմի, բանակցությունների և հրադադարի այս արատավոր շրջանը և ապա նույն օրինաչափության կրկնությունը», – ասել է Բաղային՝ շարունակվող հակամարտությունը որակելով որպես «աղետալի ոչ միայն Իրանի, այլև ամբողջ տարածաշրջանի համար և դրանից դուրս»։
Բաղային ասել է, որ Իրանը կշարունակի հակահարված տալ այնքան ժամանակ, քանի դեռ շարունակվում են ԱՄՆ-ի և Իսրայելի հարվածները, և վերահաստատել է, որ Թեհրանն իր Պարսից ծոցի հարևաններին թշնամիներ չի համարում։
«Մենք բազմիցս ասել ենք, որ վճռական ենք շարունակել մեր բարիդրացիական հարաբերությունները նրանց բոլորի հետ։ Խնդիրն այն է, որ Միացյալ Նահանգները և Իսրայելը շահագործում են նրանց տարածքներն՝ Իրանի դեմ իրենց ռազմական ագրեսիան իրականացնելու համար»,- ասել է Բաղային։
