Հայաստանի վարչապետը Ղարաբաղի կարգավիճակի հարցը լուծեց ինքնուրույն՝ այն ճանաչելով Ադրբեջանի մաս․ Լավրով
Նախագահ Պուտինը անձամբ վճռորոշ դեր է խաղացել 2020 թվականի նոյեմբերին պատերազմը կանգնեցնելու և բարձր մակարդակի եռակողմ մի քանի փաստաթղթերի համաձայնեցման հարցում։ Այդ մասին հայտարարել է ՌԴ ԱԳ նախարար Սերգեյ Լավրովը։
Լավրովը հիշատակել է Հայաստանի, Ռուսասռանի և Ադրբեջանի փոխվարչապետների մակարդակով ստեղծված սահմանազատման աշխատանքների հարցով կառույցը՝ նշելով, որ այն զբաղվում է հարցի տնտեսական կողմով․
«Վերջին շրջանում մենք տեսնում ենք, որ այդ բոլոր պայմանավորվածությունները ձեռք բերելուց հետո արևմտյան գործընկերները որոշել են, որ սխալ է, որ Ռուսաստանին հաջողվում է առաջընթաց գրանցել այս ուղղությամբ, և նրանք սկսել են հայերին և ադրբեջանցիներին հրապուրել՝ մեկ Բրյուսել, մեկ Փարիզ, մեկ Վաշինգտոն, մեկ Պրահա քաշելով։ Ի դեպ, 2022 թվականին Պրահայում վարչապետ Փաշինյանը ստորագրել է մի փաստաթուղթ, որոով Ղարաբաղը Ադրբեջանի անբաժանելի մաս է ճանաչել, – ասել է ՌԴ ԱԳ նախարարը։
Նրա խոսքով՝ սա անակնկալ էր Ռուսաստանի համար․ «Սա մեզ համար անակնկալ էր, քանի որ մինչ այս քննարկվում էին Ղարաբաղի կարգավիճակի խնդրի վերջնական լուծման տարբեր տարբերակներ։ Հայաստանի վարչապետը դա արել է ինքնուրույն։ Դրանից հետո կարգավիճակի հարցը, եւ թե ինչ է Ղարաբաղը, փակված է»,- ասաց նա։
