«Հայաքվե»-ի ներկայացրած օրինագծի ընդունումը հնարավորություն կտա վերադարձնել Արցախը. Արտակ Բեգլարյան
Արցախն այժմ կորսված է, բայց ոչ մեկընդմիշտ, Արցախի վերադարձի ու
Արցախ վերադարձի հեռանկարը կախված է նրանից, թե հատկապես այս փուլում ինչ ենք անում
մենք՝ հայ ժողովուրդը և ՀՀ-ն․ «Հայաքվեի» հրավիրած խորհրդարանական
լսումների ժամանակ հայտարարեց Արցախի նախկին պետնախարար Արտակ Բեգլարյանը։
«Նվազագույն անելիքը կամուրջները չայրելն է, էլ չասեմ, որ եղած
կամուրջներն ամրացնելու և նոր կամուրջներ կառուցելու կարիք կա։ «Հայաքվե» նախաձեռնության
կողմից առաջարկված այս օրինագիծն, իմ կարծիքով, կարևոր գաղափարական, իրավական և քաղաքական
ամուր հիմք կարող է ստեղծել Արցախի վերադարձի հետագա պայքարի համար»,-ասաց Բեգլարյանը։
Հարցին՝ արդյոք ՀՀ իշխանությունների դիրքորոշումներն Արցախն Ադրբեջանի
կազմում ճանաչելու և Արցախի ժողովրդի ինքնորոշման իրավունքն անտեսելու վերաբերյալ բացասաբար
ազդել է Արցախի կորստի վրա, Բեգլարյանը դրական պատասխան տվեց։
Արցախի նախկին պետնախարարն ասաց նաև, թե «Հայաքվե»-ի ներկայացրած
օրինագծի ընդունումը հնարավորություն կտա վերադարձնել Արցախը։ «Սա հստակ դիրքորոշում
է լինելու, որ ՀՀ-ն այլևս ընդունում է Արցախի ժողովրդի ինքնորոշման իրավունքը և պաշտպանում
է այդ իրավունքը, քանի որ միջազգային հանրության որևէ դերակատար երբեք ավելի բարձր
նշաձող չի դնելու, քան ՀՀ-ն է դրել»։
Հիշեցնենք, որ այսօր ԱԺ-ում խորհրդարանական լսումներ են՝ «Հայաքվե»
նախաձեռնության առաջարկած նախագծի թեմայով, ըստ որի Արցախն այլ պետության կազմում ճանաչելը
կամ Հայոց ցեղասպանությունը ժխտելը քրեորեն պատժելի կլինի։
