Մակրոնն ու Զելենսկին անվտանգության երկկողմ համաձայնագիր կստորագրեն

Ֆրանսիայի նախագահ Էմանուել Մակրոնն ու Վլադիմիր Զելենսկին ուրբաթ Փարիզում երկկողմ համաձայնագիր կստորագրեն Ուկրաինայի անվտանգության երաշխիքների մասին, հայտնում է Agence France-Presse-ը՝ հղում անելով Ելիսեյան պալատին։

Նշվում է, որ Զելենսկին ուրբաթ կժամանի Գերմանիա և Ֆրանսիա՝ հանդիպելու Գերմանիայի կանցլեր Օլաֆ Շոլցի և Մակրոնի հետ։

Ավելի վաղ ԶԼՄ-ները, հղում անելով Ելիսեյան պալատին, հայտնել էին, որ Մակրոնը, անվտանգության նկատառումներից ելնելով, ստիպված է եղել հետաձգել փետրվարի 13-ին և 14-ին նախատեսված այցը Կիև։

Միևնույն ժամանակ, Մակրոնն ավելի վաղ հայտարարել էր, որ Ֆրանսիան շուտով կավարտի աշխատանքը Ուկրաինայի անվտանգության երաշխիքների վերաբերյալ երկկողմ համաձայնագրի վրա և խոստացել դրա ստորագրման մասին հայտարարել փետրվարին Ուկրաինա այցի ընթացքում։