Երեկ ԱՄՆ
կոնգրեսում պետդեպարտամենտի ներկայացուցիչը հայտարարեց, որ ԱՄՆ ազգային անվտանգության
շահերը չեն տուժի, եթե ԱՄՆ-ն դադարեցնի անվտանգային աջակցությունը Ադրբեջանին: Դրանից
ժամեր անց ԱՄՆ Սենատում ընդունվեց համապատասխան իրավական ակտ, ընդ որում միաձայն՝ առ
այն, որ 907-րդ բանաձևը չի կարող շրջանցվել նախագահի կողմից մինչ 2025թ. և Բաքուն այլևս
անվտանգային օգնություն չի ստանալու Վաշինգտոնից. այս մասին ֆեյսբուքյան իր էջում
գրել է միջազգայնագետ Սուրեն Սարգսյանը։
Սարգսյանի խոսքով՝ այդ օգնությունը Ադրբեջանին տրամադրվում
էր ոչ թե Հայաստանի և Արցախի դեմ, այլ Իրանի դեմ՝ մասնավորապես Կասպից ծովի սահմանի
անվտանգության ապահովման, ինչպես նաև ահաբեկչության և ապօրինի թմրամիջոցների դեմ պայքարի
համար:
«Ադրբեջանի մասով վարչակազմի և Կոնգրեսի միջև սկզբունքային հակասություններ
չկան, սակայն այս իրավիճակը երկար չի տևի և այս ընթացքում պետք է մաքսիմալ ջանքեր գործադրել
Վաշինգտոնում մեր խարխլված դիրքերն ամրապնդելու համար»,-նշել է նա ևւ հավելել, որ այս
ուղղությամբ հայ համայնքն ու կազմակերպությունները շատ ակտիվ աշխատում են:
