Բրյուսելում մարտի 21-ին բացվում է երկօրյա գագաթնաժողով, որին մասնակցող ԵՄ երկրների ղեկավարները կքննարկեն հետագա օգնությունն Ուկրաինային, ԵՄ-ի անվտանգությունն ու պաշտպանությունը, իրավիճակը Մերձավոր Արևելքում, գյուղատնտեսությունը, Եվրամիության ընդլայնումը, արտաքին քաղաքականությունը, միգրացիան և տնտեսությունը: Այս մասին գրում է Reuters գործակալությունը։
Եվրոպական խորհրդի նախագահ Շառլ Միշելը գագաթնաժողովին մասնակցելու վերաբերյալ ԵՄ երկրների ղեկավարներին ուղղված հրավեր-նամակում միության առաջնահերթ խնդիրներից է անվանել Ուկրաինային ռազմական օգնության արագ տրամադրումը։
«Հրատապությունը, ինտենսիվությունն ու անսասան վճռականությունը հրամայական են», – հրավեր-նամակից մեջբերում է Reuters-ը։
Ակնկալվում է, որ Եվրահանձնաժողովի առաջարկների հիման վրա ԵՄ ղեկավարները կքննարկեն եվրոպական պաշտպանական արդյունաբերության ռազմավարությունը և եվրոպական պաշտպանական ներդրումային ծրագիրը:
Հանդիպման ավարտին ԵՄ առաջնորդներն Իսլանդիայի, Լիխտենշտեյնի և Նորվեգիայի իրենց գործընկերների հետ միասին կնշեն Եվրոպական տնտեսական գոտու համաձայնագրի 30-ամյակը:
