Լեմկինի ինստիտուտը դատապարտել է Վագիֆ Խաչատրյանի ազատազրկման դատավճիռը
Լեմկինի անվան Ցեղասպանության կանխարգելման ինստիտուտը հայտարարություն
է տարածել, որում դատապարտել է ադրբեջանական դատարանի կողմից Վագիֆ Խաչատրյանին 15
տարվա ազատազրկման դատապարտելը։
«Մենք կոչ ենք անում միջազգային հանրությանը համոզել նախագահ Ալիևի
վարչակարգին անհապաղ ազատ արձակել իր իրավասության ներքո գտնվող բոլոր հայերին: Պետք
է զերծ մնալ Ադրբեջանին որևէ օգնություն ցուցաբերելուց, որը կարող է խորացնել
Արցախում ցեղասպանության զոհերի տառապանքները կամ դրդել Ադրբեջանին ագրեսիայի ցանկացած
անօրինական գործողություն իրականացնել»,֊ասված է հայտարարության մեջ:
Հիշեցնենք, որ Վագիֆ Խաչատրյանն Ադրբեջանի կողմից առևանգվել էր
Հակարիի կամուրջի մոտ տեղադրված անցակետից, երբ նա բուժման նպատակով տեղափոխվում էր
Երևան: Ադրբեջանցիները նրան տարել էին շտապօգնության մեքենայից:
Ավելի ուշ արցախցի Խաչատրյանին ծանր մեղադրանքներ էին առաջադրել,
և, չնայած Խաչատրյանը չէր ընդունել դրանք, դատապարտել էին «ցեղասպանություն իրականացնելու»
և «զինված խմբավորումներ» ստեղծելու շինծու մեղադրանքով:
