ՄԱԿ hատուկ կոմիտեն Պաղեստինին կազմակերպության լիիրավ անդամի կարգավիճակ տալու գործընթաց է սկսում
ՄԱԿ–ի մասնագիտացված կոմիտեն այս ամիս կքննարկի Պաղեստինին ՄԱԿ–ի լիիրավ անդամի կարգավիճակ տալու հարցը․ տեղեկացրել է ՄԱԿ–ում Մալթայի դեսպան Վանեսա Ֆրեյզերը, ով ապրիլին նախագահում է Անվտանգության խորհուրդը:
«Խորհուրդը որոշել է, որ այս քննարկումը պետք է տեղի ունենա այս ամիս: Ժամկետն է՝ մինչև 2024 թվականի ապրիլի վերջը», – մամուլի ասուլիսում հայտարարել է Ֆրեյզերը:
ՄԱԿ–ում Պաղեստինի առաքելությունը լիիրավ անդամ ճանաչվելու համար առաջին անգամ դիմել էր 2011թ., իսկ 2012 թվականի նոյեմբերին նրան շնորհվել է «ՄԱԿ–ի դիտորդ պետության» կարգավիճակ, որը չի հանդիսանում ՄԱԿ–ի անդամ։ Նախորդ շաբաթ պաղեստինցիները թարմացրել են իրենց հայտը։
Ֆրեյզերն ասել է, որ նախօրեին կայացած փակ հանդիպումից հետո ՄԱԿ–ի Անվտանգության խորհուրդը Պաղեստին պետության ստեղծման մասին հայտ է ներկայացրել Նոր անդամների ընդունման կոմիտեին։ Իսկ այնտեղ արդեն կայացել է առաջին հանդիպումը՝ սկսելու Պաղեստինի նորացված հայտի քննարկման գործընթացը։
Նշենք, որ ՄԱԿ–ի անդամ պետություն դառնալու ցանկացած հայտ նախ պետք է անցնի Անվտանգության խորհրդով, ապա հաստատվի 193 անդամներից բաղկացած Գլխավոր ասամբլեայի կողմից:
