Պուտինը Իրանի նախագահի հետ քննարկել է իրավիճակը Մերձավոր Արևելքում
Ռուսաստանի և Իրանի նախագահներ Վլադիմիր Պուտինը և Էբրահիմ Ռաիսին քննարկել են իրավիճակը Մերձավոր Արևելքում Իսրայելի հարվածից և Թեհրանի պատասխանից հետո, գրում է РИА Новости-ն՝ հղում տալով Կրեմլի մամուլի ծառայությանը։
«Մանրամասն քննարկվել է Մերձավոր Արևելքում սրված իրավիճակը՝ Դամասկոսում իրանական դիվանագիտական ներկայացուցչության վրա Իսրայելի օդային հարվածից և Իրանի պատասխան քայլերից հետո», – ասվում է հաղորդագրության մեջ։
«Այս առումով հաստատվել են Ռուսաստանի և Իրանի սկզբունքային մոտեցումները Գազայի հատվածում անհապաղ հրադադարի հաստատման, մարդասիրական ծանր իրավիճակը մեղմելու և ճգնաժամի քաղաքական և դիվանագիտական լուծման համար պայմաններ ստեղծելու օգտին»,- նշել են Կրեմլում։
Պուտինն իր հերթին հույս է հայտնել, որ երկու կողմերն էլ զսպվածություն կդրսևորեն և թույլ չեն տա առճակատման նոր փուլ, որը աղետալի հետևանքներով է հղի ողջ Մերձավոր Արևելքի համար։
