Պարզ էր չէ՞, որ ադրբեջանական դատարանը Վագիֆ Խաչատրյանին ազատ չէր արձակելու. Արման Թաթոյան
Ակնհայտ էր չէ՞, որ ադրբեջանական դատարանը 68- ամյա Վագիֆ Խաչատրյանին
չէր էլ արդարացնելու կամ ազատ չէր արձակելու. Ֆեյսբուքյան իր էջում գրել է Մարդու իրավունքների
նախկին պաշտպան Արման Թաթոյանը:
«Պարզ էր չէ՞, որ այդ իբր դատական գործընթացը լինելու էր կեղծ ապացույցներով
բեմադրություն և անարդարության մարմնավորում։ Վագիֆ Խաչատրյանին ադրբեջանական իշխանությունն
ուղղակի դարձրեց իր քաղաքական խաղերի հերթական զոհը, որով լեգիտիմացնելու նպատակ ունի
իր հանցանքներն ու նվաստանցել հայ ժողովրդին: 15 տարի զրկել մարդուն ազատությունից,
այն էլ խիստ պայմաններում պահել Բաքվի բանտում, չի տալիս որևէ երաշխիք, որ առողջական
խնդիրներով տարեց արցախցին ի վիճակի կլինի դիմակայել ադրբեջանական թշնամանքի այդ մթնոլորտում»,֊գրել
է Թաթոյանը:
Նա հարցրել է՝ քանի՞ այդպիսի անմեղ քաղաքացի է ադրբեջանական թիրախում,
դեռ որքա՞ն է տիրելու այս անպատժելիություն:
«Մի բան հստակ է. քանի դեռ Հայաստանի գյուղերի և քաղաքների հարևանությամբ,
ճանապարհներին կան ադրբեջանական զինված ծառայողներ, մեր քաղաքացիները շարունակելու
ենք գտնվել վտանգի տակ: Իսկ ադրբեջանական կողմի հանցավոր արարքները շարունակվելու են,
քանի դեռ այդ երկրի ֆաշիստական իշխանությունն գործում է պատասխանատվության բացակայության
պայմաններում»:
