Վրաստանի խորհրդարանի ընդունած «Օտարերկրյա ազդեցության թափանցիկության մասին» օրենքի նկատմամբ արևմտյան աշխարհում մեծ ուշադրությունը պայմանավորված է Վրաստանին՝ Ռուսաստանի դեմ երկրորդ ճակատ բացելու պահանջներ ներկայացնելու հեռանկարով։ Այս մասին Վրաաստանի առաջին ալիքին տված հարցազրույցի ժամանակ հայտարարել է երկրի վարչապետ Իրակլի Կոբախիձեն։
«2022 թվականի սկզբից լուրջ շահագրգռվածություն կա Վրաստանում «երկրորդ ճակատ» բացելու հարցում, որը կթուլացնի Ռուսաստանի դիրքերը, բայց դա կկործանի մեր երկիրը: Այդ հետաքրքրությունը պահպանվում է նաև այսօր», – ասել է Կոբախիձեն։
Նրա խոսքով՝ այսօրվա աշխարհում կա «գլոբալ պատերազմի կուսակցություն», որը բացարձակապես չի հետաքրքրվում Վրաստանի ճակատագրով, և նրա միակ շահը Ռուսաստանի դիրքերի թուլացումն է։
«Նույն «Թափանցիկության մասին» օրենքն այսօր ընդունում է Թուրքիան: Օրենքը նույնիսկ ավելի կոշտ է, քան մերը, բայց ոչ ոք ՆԱՏՕ-ի անդամ երկրի մասին մեկնաբանություն չունի, տրամաբանությունը պարզ է, Թուրքիային, ի տարբերություն Վրաստանի, չի կարելի ստիպել բացել «երկրորդ ճակատը», – ասել է Կոբախիձեն:
Կոբախիձեն չի հստակեցրել, թե ով է կանգնած ենթադրյալ «գլոբալ պատերազմի կուսակցության» հետևում, սակայն ընդգծել է, որ այդ ուժը «առանցքային ազդեցություն ունի» Եվրամիության և Միացյալ Նահանգների վրա։
«Մենք կարող ենք զիջել և հրաժարական տալ, բայց այդ պարագայում իշխանությունը կանցնի այն քաղաքական ուժի ձեռքը, որը կառավարել է մինչև 2012 թվականը։ Արդյունքը կլինի Վրաստանի «ուկրաինացումը», «երկրորդ ճակատի» բացումը շատ կարճ ժամանակում, ուստի մենք դա թույլ չենք տա», – եզրափակել է Կոբախիձեն։
