Ղարաբաղը ոչ միայն պետք չէ Նիկոլ Փաշինյանին, այլև «վնասում է ներքաղաքական առումով»․ Կոնստանտին Զատուլին
Հայաստանի Անվտանգության խորհրդի քարտուղար Արմեն Գրիգորյանի հայտարարությունները Ռուսաստանի կողմից Լեռնային Ղարաբաղն Ադրբեջանին իբր «փոխանցելու» մասին բացահայտ սուտ են, հայտարարել է Պետդումայի ԱՊՀ հարցերով հանձնաժողովի նախագահի առաջին տեղակալ Կոնստանտին Զատուլինը։
«Գրիգորյանն ավելի շատ ռուսաֆոբ է, քան իր գործատու Նիկոլ Փաշինյանը, և որոշ դեպքերում՝ նա կանխատեսում կամ հայտարարում է իր լեզվով այն, ինչ իր ղեկավարի մտքում է», – նշել է Զատուլինը։
Պատգամավորի խոսքով՝ Ղարաբաղը ոչ միայն պետք չէ Հայաստանի վարչապետ Նիկոլ Փաշինյանին, այլև «վնասում է ներքաղաքական առումով», ուստի՝ նա նախընտրել է հետևել իր արևմտյան ընկերների օրինակին։
«Նա բարդ իրավիճակում է դրել Լեռնային Ղարաբաղում Ռուսաստանի խաղաղապահ առաքելությունը։ Դա, ըստ երևույթին, Արևմուտքի հետ նրա նոր բարեկամության պայմանն էր, քանի որ Արևմուտքին պետք չեն ռուս խաղաղապահներ, ինչպես ՀԱՊԿ-ին անդամակցությունը կամ Գյումրիում ռուսական բազայի առկայությունը։ Դրանք, ըստ երևույթին, հաջորդ խնդիրներն են, և պարոն Փաշինյանն ու իր կողմնակիցները ոչ մի կերպ դա չեն թաքցնում»,- ընդգծել է Զատուլինը։
