Ուկրաինայի նախագահ Վլադիմիր Զելենսկին ասել է, որ եթե Թրամփը ընտրվի ԱՄՆ նախագահի պաշտոնում, նրա հետ աշխատելը «դժվար կլինի, բայց մենք աշխատասեր ենք»․ գրում է BBC-ն։
Լոնդոնում BBC-ին տված հարցազրույցի ժամանակ Զելենսկին նշել է, որ պատրաստ է աշխատել ԱՄՆ-ում իշխանության ղեկին գտնվող յուրաքանչյուրի հետ:
Հիշեցնենք, որ օրեր առաջ Թրամփը հայտարարել էր, որ իր փոխնախագահի թեկնածուն կլինի 39-ամյա սենատոր Ջեյմս Դեյվիդ Վենսը։ Վերջինս նախկինում ասել է, որ «իրեն չի հետաքրքրում, թե ինչ կլինի Ուկրաինայի հետ»:
Վանսի թեկնածությունը մտավախություն է առաջացրել Ուկրաինայում։
«Միգուցե նա իսկապես չի հասկանում, թե ինչ է կատարվում Ուկրաինայում, ուստի մենք պետք է աշխատենք Միացյալ Նահանգների հետ», – ասել է Զելենսկին BBC-ին:
Ուկրաինայի նախագահը գտնվում է Մեծ Բրիտանիայում՝ մասնակցելու Եվրոպական քաղաքական համայնքի չորրորդ գագաթնաժողովին: