Իրանի նոր նախագահը երդվել է և Արևմուտքին հրավիրել բանակցությունների
Հուլիսի 30-ին Թեհրանում տեղի ունեցավ Իրանի նորընտիր նախագահ Մասուդ Փեզեշքիանի երդմնակալության արարողությունը։ Իրանի խորհրդարանում (մեջլիս) արարողությանը մասնակցել են ավելի քան 80 երկրների բարձրաստիճան ներկայացուցիչներ։
Ղուրանի ընթերցումից հետո խոսքը տրվեց Իրանի ՆԳՆ ղեկավար Ահմադ Վահիդիին, ով ասաց, որ երկրի համար նոր փառավոր դարաշրջան է սկսվում և «այսօրը բոլոր իրանցիների միասնությունը ցույց տվող օր է»:
Այնուհետև ելույթ ունեցավ դատական համակարգի ղեկավար Ղոլամ Հոսեյն Մոհսենի-Էջեին՝ հիշեցնելով, որ նոր նախագահը պարտավոր է ծառայել իր ժողովրդին և նպաստել երկրի զարգացմանը։
Այնուհետև Մասուդ Փեզեշքիանը երդվեց և խոստացավ, որ իր կառավարությունը «կապահովի բոլոր իրանցիների իրավունքները և միշտ առաջնահերթություն կտա ազգային շահերին, անկախ ամեն ինչից»:
«14-րդ կառավարությունը հետամուտ է լինելու Իրանի առաջընթացին և զարգացմանը, կավելացնի տնտեսական հզորությունը և կբարելավի մարդկանց կենսապայմանները»,- վստահեցրել է նա։
Նա նաև կոչ է արել արևմտյան երկրներին բանակցություններ սկսել.
«Մենք կոչ ենք անում արևմտյան երկրներին գիտակցել փոխադարձ հարգանքի և հավասարության վրա հիմնված հարաբերություններ կառուցելու անհրաժեշտությունը: Մենք պատրաստ ենք բանակցություններ վարել լարվածության լուծման ուղղությամբ այն պետությունների հետ, որոնք մինչ այժմ չեն գիտակցել, թե Իրանը ինչ տեղ է զբաղեցնում աշխարհում», – ասել է Փեզեշքիանը։
