Սեպտեմբերի 16-ին Ռումինիայում տեղի է ունեցել 5,2 մագնիտուդ ուժգնությամբ երկրաշարժ․ տեղեկացնում է «Ռումինիա» ռադիոկայանը՝ հղում տալով երկրի ֆիզիկայի ազգային ինստիտուտի կողմից տրամադրված տվյալներին: Երկրաշարժը գրանցվել է Վրանչեա սեյսմիկ գոտում, Բուզաու շրջանում, ժամը 17:40-ին (Երևանի ժամանակով՝ 18։40), 152,5 կիլոմետր խորության վրա:
Սկզբում երկրաշարժի մագնիտուդը գնահատվել էր 5,5, սակայն հետագայում մասնագետների կողմից շտկվել է: Երկրաշարժի հետևանքով Բուխարեստ-Իլֆովի շրջանի Արտակարգ իրավիճակների տեսչությունը (ISU) հաղորդագրություն է ուղարկել բնակչությանը՝ հորդորելով պահպանել հանգստություն և զգոն լինել երկրաշարժի հնարավոր հետցնցումների դեպքում:
Իշխանությունները սկսել են ուսումնասիրման աշխատանքները՝ տեղում հայտնաբերելու հնարավոր հետևանքները կամ վնասները, որոնք կարող էին առաջանալ այս սեյսմիկ աղետի հետևանքով: Մինչ այժմ, զոհերի կամ էական ավերածությունների մասին հաղորդումներ չեն ստացվել:
Վրանչեայի գոտին հայտնի է իր սեյսմիկ ակտիվությամբ, և երկրաշարժերն էլ հաճախակի են Ռումինիայի երկրաբանական պատմության մեջ:
