Թայվանի գնահատմամբ՝ Չինաստանի զորավարժությունները 2024-ին ռեկորդային ծախսերի են հասել

Թայվանի կառավարության գնահատականներով՝ Չինաստանը անցած տարի Թայվանի նեղուցում, Արևելաչինական և Հարավչինական ծովերում, ինչպես նաև Արևմտյան Խաղաղ օվկիանոսում ռազմական զորավարժությունների վրա ծախսել է մոտ 21 միլիարդ դոլար՝ գրեթե 40%-ով ավելի, քան 2023-ին. գրում է Reuters-ը:

Թայվանի զինված ուժերի ներքին հետազոտության մեջ, նշում է, որ Չինաստանի ինքնաթիռները 2024-ին կատարել են մոտ 12 հազար թռիչք՝ ավելի քան 37 հազար ժամ օդում, իսկ նավատորմը կատարել է ավելի քան 86 հազար ելք՝ 2 միլիոն ժամ անցկացնելով ծովում։

Հաշվետվության տվյալներով՝ նավարկությունների 34%-ը եղել է Հարավչինական ծովում, 28%-ը՝ Արևելաչինական ծովում, և 14%-ը՝ Թայվանի նեղուցում։

Թայվանի պաշտպանության նախարարությունը նշում է, որ «Չինաստանի շարունակական ռազմական ընդլայնումն ու սադրանքները լրջորեն վտանգում են խաղաղությունն ու կայունությունը Հնդկա-Խաղաղօվկիանոսյան տարածաշրջանում»։

Այս զորավարժությունների ծախսերը կազմել են Թայվանի 2024 թ․ պաշտպանական բյուջեի մոտ մեկ քառորդը։