32-ամյա նախկին քաղաքապետն այսօրվանից մարզպետ է․ ո՞վ է Վահագն Արսենյանը

Ջերմուկի 32-ամյա նախկին քաղաքապետ Վահագն Արսենյանը նշանակվել է Վայոց ձորի մարզպետ։ «Քաղաքացիական պայմանագիր» կուսակցությունից է։

Գնդեվազ գյուղում է ծնվել Արսենյանը, կրթությունը ստացել Երևանի պետական համալսարանում․ 2013-ին ավարտել է տնտեսագիտության ֆակուլտետը, իսկ 2015-ին՝ նույն ֆակուլտետի մագիստրատուրան՝ «Ինովացիոն կառավարում» մասնագիտությամբ։

Մասնագիտական գործունեությունը սկսել է երիտասարդ տարիքից․ առաջին պաշտոնը «Ջերմուկ Գրուպ»-ում է զբաղեցրել՝ որպես հանքային և աղբյուրի ջրերի արտադրության պետ։ Երկու տարի անց փոխել աթոռը՝ զբաղեցնելով «Էկո-Ֆարմի» գործադիր տնօրենի պաշտոնը, իսկ երեք տարի անց վերադարձել է «Ջերմուկ Գրուպ» արդեն որպես գործադիր տնօրեն։

2021 թվականի հոկտեմբերի 12-ին Վահագն Արսենյանը նշանակվել է Ջերմուկ համայնքի ղեկավարի պաշտոնակատար, իսկ դեկտեմբերի 5-ին՝ համամասնական ընտրակարգով ընտրվել համայնքի ղեկավար։ Դեկտեմբերի 17-ին պաշտոնապես ստանձնել է Ջերմուկի համայնքապետի լիազորությունները։

Նորանշանակ մարզպետ Վահագն Արսենյանը ամուսնացած է։