Ես չգիտեմ՝ կունենամ արդյոք ևս մեկ հնարավորություն խոսելու ձեզ հետ․ Ռուբեն Վարդանյանի ուղերձը

Այսօր Արցախի նախկին պետնախարար, բարերար Ռուբեն Վարդանյանի պաշտոնական էջում հրապարակվել է ձայնային ուղերձ, որը Վարդանյանը հղել է Բաքվի բանտից։

«Ես գիտակցաբար գնացել եմ այս քայլին, երբ տեղափոխվեցի Արցախ: Մարդը կյանքում ամեն ինչ անում է իր համար, իր իսկ ընտրությամբ, և պատասխան տալու է Աստծո առաջ՝ միայնակ, իր մտքերի, խոսքերի և արարքների համար:

Ես խորապես հավատացած եմ, որ նույնիսկ երբ ինչ-որ մեկը զոհաբերում է իրեն հանուն հայրենիքի, ընտանիքի կամ սկզբունքների, դա միայն իր անձնական որոշումն է և պատասխանատվությունը:

Ես չգիտեմ՝ կունենամ արդյոք ևս մեկ հնարավորություն խոսելու ձեզ հետ, ուստի ուզում եմ ներողություն խնդրել բոլորից, ում երբևէ կարող էի վիրավորել՝ խոսքով, գործով կամ անուշադրությամբ: Խնդրում եմ ներել ինձ, ես դա երբեք չեմ արել չար մտադրությամբ, նախանձով, հպարտությամբ կամ վրեժով, ես երբեք չէի ուզում որևէ մեկին ցավ պատճառել:

Առանձին ուզում եմ խոսել մեկ մարդու մասին, ում հետ կապված ցավը ինձ համար այստեղ ամենածանրն է. Ալվարդի մասին: Եթե ես չլինեի ձեր մեքենայում, եթե միասին չլինեինք ձեր ամուսնու հետ, նա հիմա ձեր կողքին կլիներ: Ներեցեք ինձ, խնդրում եմ: Ինձ համար ամենածանր պատիժն այն է, որ մեկ այլ մարդ էլ է այստեղ տառապում իմ պատճառով: Ես նաև ուզում եմ առանձին ներողություն խնդրել բոլոր այն երեխաներից, ովքեր զրկվել են իրենց հայրենիքից, քանի որ ես չկարողացա անել այն ամենը, ինչ կարող էի և պետք է անեի, որպեսզի դա չլիներ:

Ես արեցի այն, ինչ ճիշտ համարեցի, ես բարոյական իրավունք ունեմ դա ասել, որովհետև ես եղել եմ ձեզ հետ, բայց միայնակ՝ առանց ընտանիքիս:

Ես ուրախ եմ, որ կարողացա կանխել որոշ բաներ, որոնք, իմ կարծիքով, վերջնականապես կկոտրեին մեզ որպես ազգ: Եվ ես դա կանգնեցրի, մի փոքր փոխեցի պատմության ընթացքը:

Ես երջանիկ եմ, որ այս դժվարին ժամանակներում եղել եմ Արցախի ժողովրդի կողքին, զգացել եմ ձեր սերը, ջերմությունը, շնորհակալությունը և վստահությունը:

Ես հպարտանում եմ ձեզնով, իմ հարազատ, ազնիվ ու անկեղծ մարդկանցով, և բոլորիդ անկեղծորեն սիրում եմ:

Ամեն ինչ հաղթահարելու ենք միասին: Ես ձեզ սիրում եմ, հարգում եմ և վստահ եմ, որ, չնայած բոլոր ծանր դժվարություններին, մենք կհաղթահարենք դրանք:

Ես՝ Ռուբեն Վարդանյանս, որպես Կարլենի որդի, Համո Վարդանյանի թոռ և իմ բոլոր նախնիների ժառանգ, ձեր կողքին եմ»,- ասվում է ուղերձում։