Մարտուն Գրիգորյանի հայրն ու որդին ազատ են արձակվել

ՀՀ ԱԺ «Պատիվ ունեմ» խմբակցության պատգամավոր, «Մեր քաղաքը» դաշինքի կողմից Գյումրու համայնքապետի թեկնածու Մարտուն Գրիգորյանի որդին` Կարեն Գրիգորյանը, և հայրը` Կամո Գրիգորյանը, ազատ են արձակվել դատարանի դահլիճից։

Փաստաբան Արսեն Բաբայանը Կամո Գրիգորյանի գործով նիստը խայտառակություն է որակել, և նշել, որ քննիչը հայտարարել է, թե հրաժարվում է պատասխանել պաշտպանների բոլոր հարցերին։

«Քննիչը որևէ փաստական հանգամանք չի կարողացել ներկայացնել Կամո Գրիգորյանի հանցանք կատարելու մասով։ Կիրառվե՞լ է վարչական վերահսկողություն, թե՞ ոչ, պարզ կլինի 15:00-ին:

Ակնհայտ է, որ այս հետապնդումը քաղաքական բնույթ ունի ու ես դատարանում այդ մասին ասել եմ։ Ես նաև ընդգծել եմ, որ թեկնածուներից մեկը` Սարիկ Մինասյանը, տնակներ էր այցելել օրեր առաջ, որտեղ բնակիչներից մեկին ասել էր. «հենց փայտդ վերջանա, քեզ փայտ կուղարկեմ»։ Սա արեցի, քանի որ խտրական վերաբերմունք կա»»,- ասել է Բաբայանը:

Հիշեցնենք, որ մարտի 27-ին իրավապահները խուզարկություններ են իրականացրել Մարտուն Գրիգորյանի տանն ու նախընտրական շտաբում ու ձերբակալել Կամո և Կարեն Գրիգորյաններին։ Քրգործ է հարուցվել պատգամավոր Մարտուն Գրիգորյանի՝ փողոցներ «շեբենապատելու» համար, ինչը ներկայացվում է որպես ընտրակաշառք։