Ադրբեջանցիները փոխել են կրակելու ժամերը․ Խնածախի գյուղապետը ABC media-ին մանրամասներ է հայտնել
Ադրբեջանցիները գիշերը կրակել են Սյունիքի սահմանապահ Խնածախ գյուղի ուղղությամբ. ABC media-ի հետ զրույցում ասաց Խնածախ համայնքի ղեկավար Սեյրան Միրզոյանը:
«Այս պահին գյուղում նորմալ վիճակ է, մարդիկ իրենց բնականոն կյանքով են ապրում, ադրբեջանցիները փորձում են վախեցնել, բայց դա հաստատ չի ստացվի իրենց մոտ: Կրակոցները կան, եթե համեմատենք մնացած օրերի հետ, ինտենսիվությունը մի փոքր նվազել է, բայց լսում ենք կրակոցների ձայները: Այս գիշեր, եթե չեմ սխալվում, մի չորս անգամ կրակել են, էլ ֆիքսված ժամերի չեն կրակում, փոխել են ժամերը, երևի հոգնել են»,- ասաց Սեյրան Միրզոյանը:
Համայնքի ղեկավարը նշեց նաև, որ իրենց գյուղի բնակչությանը վախեցնելը մի փոքր բարդ է:
«Չգիտեմ իրենց պլաններն ինչ են, բայց մեր ժողովուրդը վախեցող տեսակ չէ: Պարզապես մտահոգիչ է մի քիչ, որ կրակում են»,-ասաց Միրզոյանը:
Նրա խոսքով` գյուղում ամեն մեկը բացառապես իր երեխայի համար է վախենում, մնացած բոլոր առումներով գյուղում ներդաշնակ իրավիճակ է:
«Որպեսզի պատկերացնեք, ժողովուրդն էս պահին ամեն մեկն իր ջերմոցներով, իր բոստաններով է, գարուն է, հողն են մշակում»,- եզրափակեց համայնքի ղեկավարը:
