ՀՀ իշխանությունները, Հայ եկեղեցու դեմ հարձակումներ և սպառնալիքներ կիրառելով, գերազանցում են իրենց լիազորությունները․ Ռուս ուղղափառ եկեղեցու ներկայացուցիչ

Հայաստանի իշխանությունները, Հայ առաքելական եկեղեցու դեմ հարձակումներ և սպառնալիքներ կիրառելով, գերազանցում են իրենց լիազորությունները։ Օրենքով Եկեղեցին անջատ է պետությունից։ Հայ ժողովուրդը դրան վերաբերվում է «մեծ հարգանքով», և վարչապետ Նիկոլ Փաշինյանին լիազորություն չի տվել այն բարեփոխելու իր հայեցողությամբ․ РИА Новости–ին ասել է Մոսկվայի և Համայն Ռուսիո պատրիարք Կիրիլի խորհրդական,  քահանա Նիկոլայ Բալաշովը։

«Տպավորություն է, որ Հայաստանի կառավարության ներկայիս ղեկավարը որոշել է անհավասար պայքարի մեջ մտնել ազգային հոգևոր կարգերի հետ, և այդ նպատակով նա դիմում է հոգևորականության նկատմամբ հալածանքների և վիրավորանքների, ձերբակալում հոգևորականներին և սպառնում է բռնագրավել եկեղեցական շենքերը։ Սա կարող է պայմանավորված լինել արտաքին ուժերի ազդեցությամբ, քանի որ նման գաղափարներն ակնհայտորեն չեն արտացոլում հայ ժողովրդի զգացմունքները, որոնք բարձր են գնահատում իրենց Եկեղեցին և չեն տվել Փաշինյանին այն սեփական քմահաճույքով բարեփոխելու լիազորություն», – ասել է Բալաշովը։

Չորեքշաբթի խորհրդարանում ելույթ ունենալով՝ Նիկոլ Փաշինյանը սպառնացել էր բռնագրավել պետությանը պատկանող և ՀԱԵ-ի կողմից օգտագործվող եկեղեցիները, քանի որ «այնտեղ հոգևոր կյանք չկա»։ Նրա խոսքով՝ այն վայրը, որտեղ «հոգևոր կյանք գոյություն ունի», Հովհաննավանքն է, որի վանահայրը քահանա Արամ Ասատրյանն էր (նախկինում Ամենայն հայոց կաթողիկոս Գարեգին II-ը կարգալույծ է արել Ասատրյանին՝ բազմաթիվ խախտումների և Եկեղեցին վարկաբեկելու համար)։ Ըստ լրատվամիջոցների հաղորդագրությունների՝ Փաշինյանը խորհրդարանում նաև հայտարարել է, որ Հայ առաքելական եկեղեցու առաջնորդ Գարեգին II-ն այլևս չի ներկայացնում հոգևորականությունը և որ նրա եղբայրը՝ Եզրաս արքեպիսկոպոսը, «ԿԳԲ-ի գործակալ» է։