Վրաստանը չի մասնակցի Եվրանեսթի վեհաժողովի նիստերին
Վրաստանի կառավարությունը չի մասնակցի Եվրանեսթի Խորհրդարանական վեհաժողովի նիստերին։ Այս մասին Х-ում հայտարարել է Վրաստանի խորհրդարանի խոսնակ Շալվա Պապուաշվիլին։
«Ակնհայտ է, որ Եվրախորհրդարանը Եվրանեսթի հարթակը վերածել է շանտաժի գործիքի և իր նեղ քաղաքական օրակարգը հարևան երկրներին բռնի կերպով պարտադրելու միջոցի»,- գրել է Պապուաշվիլին։
Նա հավելել է, որ Վեհաժողովն անտեսում է վրաց ժողովրդի կամքը՝ նպատակ ունենալով չեղյալ հայտարարել երկրի ընտրությունները և կասկածի տակ դնելով Վրաստանի ժողովրդավարական ինստիտուտները։
Ավելի վաղ Վրաստանի նախագահ և նախկին ֆուտբոլիստ Միխեիլ Կավելաշվիլին հայտարարել էր երկրի՝ Եվրամիությանը (ԵՄ) միանալու ձգտման մասին։ Միևնույն ժամանակ, Վրաստանի նախագահը նշել էր, որ ԵՄ-ին անդամակցության ճանապարհը պետք է ուղեկցվի Վրաստանի արժեքների և ինքնության պաշտպանությամբ։
