ԱՄՆ-ի և Իրանի միջև լարվածությունը մեծացել է, մենք չենք ուզում նոր պատերազմ տարածաշրջանում․ Էրդողան
Թուրքիայի նախագահ Ռեջեփ Թայիփ Էրդողանը Իրանի և ԱՄՆ-ի նախագահների հետ բանակցությունների մասին մանրամասներ է հայտնել։
«Առաջին հերթին մենք անում ենք ամեն ինչ՝ ԱՄՆ-ի և Իրանի միջև լարվածությունը նվազեցնելու համար՝ առանց տարածաշրջանը նոր հակամարտության կամ քաոսի մեջ ներքաշելու։ Այդ նպատակով, ինչպես գիտեք, ես հեռախոսազրույց եմ ունեցել ԱՄՆ նախագահ Դոնալդ Թրամփի, իսկ հաջորդ օրը՝ Իրանի նախագահ Մասուդ Փեզեշքիանի հետ»,- ասել է նա։
Էրդողանը նաև տեղեկացրել է, որ Ստամբուլում հանդիպել է նաև Իրանի արտգործնախարար Աբբաս Արաղչիի հետ։
«Մենք այս հարցը պահում ենք օրակարգում։ Մենք բացահայտորեն հայտարարել ենք Իրանում ռազմական միջամտության դեմ մեր դիրքորոշումը և դա փոխանցել ենք մեր գործընկերներին։ Մինչ այժմ ես տեսնում եմ, որ երկու կողմերն էլ պատրաստ են բացել դիվանագիտության ճանապարհը։ Սա դրական զարգացում է», – հայտարարել է Էրդողանը։
Նա նշել է, որ դեռևս կա երկխոսության և դիվանագիտության հնարավորություն. «Ես կարծում եմ, որ քննարկումներում առաջընթացից հետո առաջնորդների մակարդակով բանակցությունները նույնպես օգտակար կլինեն։ Հաշվի առնելով ռազմական լարվածության աճը՝ կարևոր է այս կամ այն կերպ բանակցային սեղանի շուրջ նստել։ Մենք հույս ունենք, որ խնդիրները կլուծվեն երկխոսության միջոցով, և որ մեր տարածաշրջանում նոր հակամարտություն չի բռնկվի։ Մենք կձգտենք ամրապնդել բանակցությունների հիմքը՝ թե՛ առաջնորդական դիվանագիտության միջոցով, թե՛ այլ մակարդակներում։ Ամենից առաջ մենք չենք ուզում, որ մեր տարածաշրջանում կրկին պատերազմ սկսվի»։
