Էրդողանը հաստատել է՝ Թուրքիան թույլ չի տվել Իսրայելի նախագահին օգտագործել իր օդային տարածքը Բաքու մեկնելու համար
Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան մերժել է Իսրայելի նախագահ Իսահակ Հերցոգին օգտագործել իր օդային տարածքը Ադրբեջանում COP29 կլիմայի գագաթնաժողովին մասնակցելու համար՝ ընդգծելով Անկարայի դիրքորոշումը Իսրայելի հետ լարվածության ֆոնին:
«Մենք Իսրայելի նախագահին թույլ չենք տվել օգտագործել մեր օդային տարածքը COP-ի գագաթնաժողովին մասնակցելու համար: Մենք առաջարկել ենք այլընտրանքային ուղիներ և այլ տարբերակներ»,- Բրազիլիայում G20 գագաթնաժողովի ժամանակ լրագրողներին հայտարարել է Էրդողանը: Հերցոգն ի վերջո չեղարկել է այցը։
«Գնահատելով իրավիճակը և անվտանգության նկատառումներից ելնելով՝ պետության նախագահը որոշել է չեղարկել իր այցն Ադրբեջան», – նշվել է Իսրայելի նախագահի աշխատակազմի հայտարարությունում:
Իսրայելը ավերիչ պատերազմ է սկսել Համասի դեմ Գազայում ։ Թուրքիան հետ է կանչել Իսրայելից իր դեսպանին խորհրդակցությունների համար Գազայի պատերազմի սկսվելուց հետո, սակայն պաշտոնապես չի խզել իր հարաբերությունները Իսրայելի հետ, իսկ նրա դեսպանատունը շարունակում է իր աշխատանքը։
