Ռուսաստանը սպասում է Ուկրաինայի պաշտոնական հաստատմանը՝ զոհված զինվորների մարմինների փոխանակման վերաբերյալ
Ռուսաստանի պաշտպանության նախարարությունը հայտնել է, որ Մոսկվան՝ Ստամբուլում ձեռք բերված պայմանավորվածությունների համաձայն, արդեն հասցրել է 1212 զոհված ուկրաինացի զինծառայողի մարմին փոխանակման վայր։
ՌԴ բանակցային խմբի անդամ, գեներալ-լեյտենանտ Ալեքսանդր Զորինի խոսքով՝ բոլոր մարմինները, «հագուստով ու գտնվելու վայրով» ճանաչվել են որպես Ուկրաինայի զինված ուժերի զինծառայողներ։
«Սա առաջին խմբաքանակն է, առաջին փուլը»,- նշել է Զորինը՝ հավելելով, որ ռուսական կողմը պատրաստ է կատարել բոլոր պայմանավորվածությունները, այդ թվում՝ գերիների փոխանակման և զոհվածների մարմինների փոխանցման մասին։
Ըստ նրա՝ ժամեր անց սահման կշարժվեն նաև մյուս գնացքները, որոնք նույնպես տեղափոխում են մարմիններ։
Սակայն Զորինը նշել է, որ կան ազդանշաններ, թե ուկրաինական կողմը կարող է փոխանակումը հետաձգել մինչև հաջորդ շաբաթ, գրում է Կոմերսանտը։
Նախօրեին ՌԴ նախագահի օգնական Վլադիմիր Մեդինսկին հայտարարել էր, որ Մոսկվան կոչ է անում Կիևին՝ վերցնել զոհվածների մարմինները՝ «դրանք մարդկային ձևով հողին հանձնելու» նպատակով։
