Ադրբեջանի ԱԳՆ-ն խորհուրդ է տվել Պուտինի օգնականին զերծ մնալ հարցերից, որոնք չեն մտնում նրա իրավասության մեջ
Ադրբեջանի Արտաքին գործերի նախարարությունն արձագանքել է Ուկրաինայի հետ բանակցությունների ռուսական պատվիրակության ղեկավար, Ռուսաստանի նախագահի օգնական Վլադիմիր Մեդինսկու այն խոսքերին, որ Ուկրաինայում հակամարտությունում իրական խաղաղության կնքման բացակայությունը տարածաշրջանը կարող է վերածվել «հսկայական Ղարաբաղի»։
«Ռուսաստանի նախագահի օգնական Վլադիմիր Մեդինսկու կողմից հունիսի 9-ին Russia Today հեռուստաալիքին տված հարցազրույցում արված հայտարարությունը, որը պարունակում է անցյալի հայ-ադրբեջանական հակամարտության վերաբերյալ փաստերի աղավաղում, ինչպես նաև Ղարաբաղը որպես «վիճելի տարածք» ներկայացնելը, ցավալի և ապշեցուցիչ է», – հայտարարել է Ադրբեջանի ԱԳՆ խոսնակ Այհան Հաջիզադեն։
Նա «զարմացած» է, որ Մեդինսկին «չգիտի, որ Ղարաբաղը երբեք վիճելի տարածք չի եղել»։«Հարցեր է առաջացնում նաև այն փաստը, որ այն երկրի նախագահի օգնականը, որն ինքն էլ Մինսկի խմբի համանախագահ էր, կա՛մ չի հասկանում, կա՛մ չի ցանկանում հասկանալ իր պետության պաշտոնական դիրքորոշումն այս հարցում», – նշել է Բաքվի ներկայացուցիչը։
Մեդինսկին, ըստ Հաջիզադեի, «անընդունելի զուգահեռ է անցկացնում Ռուսաստանի կողմից Ուկրաինայի դեմ պատերազմի և Ղարաբաղում ստեղծված իրավիճակի միջև»։
Նրա խոսքով՝ Ադրբեջանն, իբր, «երբեք չի խախտել այլ պետությունների տարածքային ամբողջականությունը և ագրեսիվ պատերազմներ չի մղել այլ երկրների դեմ, ուստի՝ նման համեմատությունները բացարձակապես սխալ են»։
Բաքուն խորհուրդ է տվել Վլադիմիր Պուտինի օգնականին «զերծ մնալ կեղծ հայտարարություններ տարածելուց այն հարցերի վերաբերյալ, որոնք չեն մտնում նրա իրավասության մեջ և վնասում են միջպետական հարաբերություններին»։
Ավելի վաղ Վլադիմիր Մեդինսկին հայտարարել էր, որ Ուկրաինայում հակամարտությունը դադարեցնելու արդյունքն առանց իրական խաղաղության կնքման կարող է լինել միջուկային պատերազմը։
«Եթե մենք դադարեցնենք հակամարտությունը ռազմաճակատի երկայնքով և չհամաձայնվենք իրական խաղաղության, պարզապես կնքենք որևէ տեսակի զինադադար, ապա դա կլինի՝ գիտեք, Հայաստանի և Ադրբեջանի միջև կար վիճելի տարածաշրջան՝ Ղարաբաղը, ապա այս տարածաշրջանը կվերածվի հսկայական Ղարաբաղի։ Որոշ ժամանակ անց Ուկրաինան՝ ՆԱՏՕ-ի հետ միասին, իր դաշնակիցների հետ միասին, կմիանա ՆԱՏՕ-ին, կփորձի վերադարձնել այն, և սա կլինի մոլորակի վերջը։ Դա կլինի միջուկային պատերազմ։ Մոսկվան չի ցանկանում, որ ստեղծվի պատրվակ՝ հսկայական Ղարաբաղ, որը ոչ մեկի կողմից չի ճանաչվել, որի պատճառով կարող է բռնկվել միջուկային պատերազմ։ Հետևաբար, մենք ուզում ենք դադարեցնել, կնքել լիարժեք խաղաղություն և ճանաչել նոր տարածքները», – նշել է Մեդինսկին։
