Իսրայելի կողմից Իրանին հարվածելուց հետո մի շարք ավիաընկերություններ վերահասցեագրել են չվերթները, փակել օդային տարածքները

Flightradar24-ի տվյալները ցույց են տալիս, որ ավիաընկերությունները ուրբաթ լքել են Իսրայելի, Իրանի, Իրաքի և Հորդանանի օդային տարածքը այն բանից հետո, երբ Իսրայելը հարձակումներ է իրականացրել Իրանում գտնվող թիրախների վրա․ հայտնում է Reuters գործակալությունը։

Իրանի վրա հարվածների մասին հաղորդագրությունների տարածվելուն պես մի շարք ավիաընկերությունների, այդ թվում՝ Dubai’s Emirates-ի, Lufthansa-ի և Air India-ի, առևտրային չվերթները սպասարկող ինքնաթիռները Իրանի օդային տարածքում են եղել։

Air India-ն, որը օգտվում է Իրանի օդային տարածքից դեպի Եվրոպա և Հյուսիսային Ամերիկա չվերթների համար, հայտարարել է, որ մի քանի չվերթներ, այդ թվում՝ Նյու Յորքից, Վանկուվերից, Չիկագոյից և Լոնդոնից, վերահասցեագրվել կամ վերադարձվել են իրենց սկզբնակետ։

Իրաքի պետական լրատվամիջոցները հայտնել են, որ ուրբաթ առավոտյան Իրաքը փակել է իր օդային տարածքը և դադարեցրել երթևեկությունը օդանավակայաններում։

Թել Ավիվի Բեն Գուրիոն օդանավակայանը փակ է մինչև հետագա ծանուցում։ Իրանի կողմից հնարավոր պատասխան հարվածների պատճառով Իսրայելի հակաօդային պաշտպանության ստորաբաժանումները բարձր պատրաստվածության վիճակում են

Ըստ պետական լրատվամիջոցների և օդաչուներին ուղղված ծանուցումների՝ Իրանի օդային տարածքը նույնպես փակ է մինչև հետագա ծանուցում։

Հիշեցնենք, որ Իսրայելը ուրբաթ հայտարարել է, որ թիրախավորել է Իրանի միջուկային օբյեկտները, բալիստիկ հրթիռների գործարանները և ռազմական հրամանատարներին՝ Թեհրանի կողմից ատոմային զենքի ստեղծումը կանխելու համար նախատեսված երկարատև գործողության սկզբում։ Գործողությունն, ըստ Իսրայելի նախազգուշացման, երկարատև կլինի։