ՀԱՊԿ-ում ՀՀ դաշնակից Բելառուսը խորացնում է ռազմական համագործակցությունն Ադրբեջանի հետ
Ադրբեջանի պաշտպանության նախարար Զաքիր Հասանովը պաշտոնական այցով նախորդ օրը Մինսկում բանակցություններ է վարել Բելառուսի պաշտպանության նախարարության ղեկավար Վիկտոր Խրենինի հետ:
Բելառուսի գերատեսչության տվյալներով՝ «կողմերը քննարկել են երկկողմ ռազմական համագործակցության ներկա վիճակը և նախանշել են այն խորացնելու ուղիները փոխադարձ հետաքրքրություն ներկայացնող ոլորտներում»։
«Մենք մեր հարաբերություններում կամ փոխըմբռնման մեջ խնդիրներ չունենք: Մեզ միայն պետք է վերանայենք համագործակցության հիմնական ոլորտները», – հանդիպման ժամանակ հայտարարել է Վիկտոր Խրենինը։
Նրա խոսքով՝ Բելառուսի և Ադրբեջանի միջև համագործակցությունը բնութագրվում է վստահության բարձր մակարդակով։
«Եվս մեկ անգամ կցանկանայի ընդգծել մեր երկկողմ հարաբերությունների բարձր մակարդակը ռազմական ոլորտում, և ամենակարևորն՝ առկա փոխադարձ հետաքրքրությունը և դրանց հետագա խորացման ներուժը», – նշել է Բելառուսի Պաշտպանության նախարարության ղեկավարը։
Իր հերթին՝ Ադրբեջանի պաշտպանության նախարարը նշել է, որ ադրբեջանական կողմը բարձր է գնահատում երկու երկրների միջև ռազմական և ռազմատեխնիկական համագործակցությունը և նպատակ ունի նաև խորացնել այն։
Հիշեցնենք, որ Մինսկն ու Բաքուն մի քանի տարի համագործակցում են ռազմատեխնիկական ոլորտում։ Սա սուր քննադատության է արժանացել Հայաստանի կողմից, որը, ինչպես Բելառուսը, Հավաքական անվտանգության պայմանագրի կազմակերպության անդամ է։
