Իրանը զգուշացնում է «խաղամոլ» Թրամփին. Մենք կավարտենք այս պատերազմը․ Reuters

Չնայած Իրանը շարունակում է հրթիռներ արձակել Իսրայելի ուղղությամբ, այն դեռևս միջոցներ չի ձեռնարկել Միացյալ Նահանգների դեմ՝ ո՛չ ամերիկյան բազաների վրա կրակ բացելով, ո՛չ էլ համաշխարհային նավթային փոխադրումների 20%-ը թիրախավորելով, որոնք անցնում են իր ափի մոտով․ գրել է Reuters-ը։

«Պարո՛ն Թրամփ, խաղամո՛լ, դուք կարող եք սկսել այս պատերազմը, բայց մենք կլինենք այն ավարտողները», – հայտարարել է Իրանի Խաթամ ալ-Անբիա կենտրոնական ռազմական շտաբի խոսնակ Էբրահիմ Զոլֆաքարին ձայնագրված տեսաուղերձի ավարտին։

Ինչպես նշվել է, այսօր Իրանը և Իսրայելը փոխանակել են օդային և հրթիռային հարվածների ևս մեկ ալիք, մինչդեռ աշխարհը պատրաստվում էր Թեհրանի պատասխանին։

Թրամփի վարչակազմը բազմիցս հայտարարել է, որ իր նպատակը միայն Իրանի միջուկային ծրագիրը ոչնչացնելն է, այլ ոչ թե՝ ավելի լայն պատերազմ սկսելը։

Արբանյակային պատկերները հետազոտող փորձագետները նշել են, որ, կարծես թե, ԱՄՆ հարձակումը լրջորեն վնասել է Իրանի Ֆորդոու ատոմակայանի տարածքը, որը կառուցվել է լեռան ներսում, և հնարավոր է՝ ոչնչացրել է այն և այնտեղ տեղակայված ուրանի հարստացման ցենտրիֆուգները՝ չնայած անկախ կողմի հաստատման բացակայությանը։

Իրանը պնդում է, որ իսրայելական հարձակումների հետևանքով զոհվել է ավելի քան 400 մարդ, հիմնականում՝ քաղաքացիական անձինք, սակայն ռմբակոծության առաջին օրերից ի վեր քիչ լուսանկարներ է հրապարակել վնասի մասին։ 10 միլիոն բնակչություն ունեցող Թեհրան քաղաքը մեծ մասամբ դատարկվել է․ բնակիչները փախչում են գյուղեր՝ հարձակումներից խուսափելու համար։ Իսրայելի վրա Իրանի կողմից հրթիռային հարվածների հետևանքով զոհվել է 24 մարդ, բոլորը քաղաքացիական անձինք, և հարյուրավոր մարդիկ վիրավորվել են։ Սա առաջին դեպքն է, երբ իրանական հրթիռների զգալի քանակություն թափանցել է Իսրայելի պաշտպանության համակարգի միջով։

Արևմուտքին վնասելու Իրանի ամենաարդյունավետ սպառնալիքը, հավանաբար, կլինի Պարսից ծոցից համաշխարհային նավթի հոսքի սահմանափակումը։ Նավթի գները երկուշաբթի օրը կտրուկ աճել են՝ հասնելով հունվարից ի վեր ամենաբարձր մակարդակին։ Սակայն դրանք դեռևս չեն հասել ճգնաժամային մակարդակի։
Իրանի խորհրդարանը հաստատել է Պարսից ծոց տանող Հորմուզի նեղուցը փակելու առաջարկը, ինչը պահանջում է Ազգային անվտանգության բարձրագույն խորհրդի հաստատումը, որը գլխավորում է Գերագույն առաջնորդ այաթոլլահ Ալի Խամենեիի նշանակած անձը։

Նեղուցը խեղդելու փորձը կարող է կտրուկ բարձրացնել նավթի համաշխարհային գները, խաթարել համաշխարհային տնտեսությունը և հակամարտության պատճառ դառնալ ԱՄՆ ռազմածովային ուժերի հսկայական հինգերորդ նավատորմի հետ, որը պարեկում է Պարսից ծոցը Բահրեյնի իր բազայից։

«Դա նրանց համար տնտեսական ինքնասպանություն կլինի», – հայտարարել է ԱՄՆ պետքարտուղար Մարկո Ռուբիոն։

Մինչ Թեհրանը կշռադատում էր իր տարբերակները, Մոսկվայում սպասվում է Իրանի արտգործնախարար Աբբաս Արաքչի բանակցությունները Ռուսաստանի նախագահ Վլադիմիր Պուտինի հետ։ Կրեմլը ռազմավարական գործընկերություն ունի Իրանի հետ, բայց նաև սերտ կապեր՝ Իսրայելի հետ։