Իրանը մինչ այժմ տպավորված չէ ՌԴ-ի աջակցությամբ և ցանկանում է, որ Պուտինն ավելին անի՝ Իսրայելի և ԱՄՆ-ի դեմ պայքարելու համար․ Reuters

Իրանի գերագույն առաջնորդն իր արտաքին գործերի նախարարին ուղարկել է Մոսկվա՝ Ռուսաստանի նախագահ Վլադիմիր Պուտինից լրացուցիչ օգնություն խնդրելու համար՝ 1979 թվականի հեղափոխությունից ի վեր ԱՄՆ-ի կողմից Իսլամական Հանրապետության դեմ իրականացված ամենամեծ ռազմական գործողությունից հետո․ հայտնել են Reuters-ի աղբյուրները։

Ինչպես նշվել է, ԱՄՆ նախագահ Դոնալդ Թրամփը և Իսրայելը հրապարակավ ենթադրություններ են արել Իրանի գերագույն առաջնորդ այաթոլլահ Ալի Խամենեիի սպանության և ռեժիմի փոփոխության մասին, մի քայլ, որն, ըստ Ռուսաստանի, կարող է խորտակել Մերձավոր Արևելքը։ Թեպետ Պուտինը դատապարտել է Իսրայելի հարվածները, նա դեռևս չի մեկնաբանել ԱՄՆ-ի կողմից Իրանի միջուկային օբյեկտների վրա հարձակումները՝ չնայած անցյալ շաբաթ հանգստության կոչ էր արել և առաջարկել Մոսկվայի ծառայությունները որպես միջուկային ծրագրի միջնորդ։
Աղբյուրը Reuters-ին հայտնել է, որ Իրանի արտաքին գործերի նախարար Աբբաս Արաղչին պետք է փոխանցի Խամենեիի նամակը Պուտինին՝ խնդրելով վերջինիս աջակցությունը։

Իրանական աղբյուրների փոխանցմամբ՝ Իրանը մինչ այժմ տպավորված չէ Ռուսաստանի աջակցությամբ, և երկիրը ցանկանում է, որ Պուտինն ավելին անի՝ Իսրայելի և Միացյալ Նահանգների դեմ պայքարելու համար։ Աղբյուրները չեն մանրամասնել, թե ինչ օգնություն է Թեհրանը ցանկանում։

Ինչպես հիշեցրել է գործակալությունը, Պուտինը բազմիցս առաջարկել է միջնորդել Միացյալ Նահանգների և Իրանի միջև՝ հայտարարելով, որ ինքը նրանց է փոխանցել Մոսկվայի գաղափարները հակամարտությունը լուծելու վերաբերյալ՝ միաժամանակ ապահովելով Իրանի շարունակական հասանելիությունը քաղաքացիական միջուկային էներգիային։

Կրեմլի ղեկավարը անցյալ շաբաթ հրաժարվել է քննարկել այն հնարավորությունը, որ Իսրայելը և Միացյալ Նահանգները կսպանեն Խամենեիին։

ՌԴ ղեկավարի խոսքով՝ Իսրայելը Մոսկվային երաշխիքներ է տվել, որ Իրանի Բուշերի ատոմակայանում ևս երկու ռեակտոր կառուցելուն օգնող ռուս մասնագետները չեն տուժի օդային հարվածներից։

Ռուսաստանը, որը Թեհրանի վաղեմի դաշնակիցն է, դեր է խաղում Իրանի միջուկային բանակցություններում Արևմուտքի հետ՝ որպես վետոյի իրավունք ունեցող ՄԱԿ-ի Անվտանգության խորհրդի անդամ և ստորագրող կողմ այն միջուկային համաձայնագրի, որից Թրամփը դուրս է եկել իր նախագահության առաջին ժամկետի ընթացքում՝ 2018 թվականին։

Սակայն Պուտինը, ով պատերազմ է մղում Ուկրաինայում, և ում հետ Թրամփը փորձում է վերականգնել կապերը, մինչ այժմ հրապարակայնորեն քիչ ցանկություն է հայտնել Իրանի շուրջ Միացյալ Նահանգների հետ առճակատման մեջ մտնելու ուղղությամբ։