Մեկ շաբաթում քաղաքական 2-րդ հակառակորդի ձերբակալությունը. AP news-ը` Բագրատ սրբազանի մասին
Հայաստանի անվտանգության ծառայությունները ձերբակալել են երկրի առաջատար կրոնական առաջնորդներից մեկին՝ մեղադրելով ահաբեկչության և կառավարությունը տապալելու դավադրության մեղադրանքով: Սա մեկ շաբաթվա ընթացքում երկրորդ ձերբակալությունն էր հայտնի քաղաքական հակառակորդի նկատմամբ. գրել է AP news-ը:
Նշվել է, որ Բագրատ արքեպիսկոպոս Գալստանյանն ազդեցիկ Առաքելական եկեղեցու կարևոր դեմք է: Նրա փաստաբանը մեղադրանքները որակել է որպես «հորինվածք»։
Գալստանյանը ղեկավարել է «Սրբազան պայքար» ընդդիմադիր շարժումը և պահանջել է վարչապետ Նիկոլ Փաշինյանի հրաժարականը, այն բանից հետո, երբ Հայաստանը համաձայնել է մի քանի սահմանամերձ գյուղերի վերահսկողությունը հանձնել թշնամի Ադրբեջանին և կարգավորել հարևանների միջև հարաբերությունները։
«Սրբազան պայքարը» նույնպես մեղադրանքները որակել է կեղծ և մեղադրել կառավարությանը քաղաքական իրավունքները ճնշելու համար։
Գործակալությունն ընդգծել է, որ չնայած տարածքային զիջումը շարժման հիմնական խնդիրն էր, այն ընդլայնվել է և ընդգրկել է 2018 թվականին իշխանության եկած Փաշինյանի վերաբերյալ բողոքների լայն շրջանակ։
Գյուղերը հանձնելու որոշումը կայացվել է 2023 թվականի սեպտեմբերին կայծակնային ռազմական արշավից հետո, որի ընթացքում Ադրբեջանի զինված ուժերը ստիպել են Ղարաբաղի տարածաշրջանի էթնիկ հայերին հանձնվել։
Մեղադրանքները վիճարկելուց բացի՝ Գալստանյանի փաստաբան Սերգեյ Հարությունյանը նշել է, որ ոստիկանությունը վեց ժամ խուզարկել է հոգևորականի բնակարանը, բայց գտել է միայն ծխային ռումբեր, որոնք սովորաբար օգտագործվում են Հայաստանում բողոքի ցույցերի ժամանակ։
«Նրանք ժամանակ են ծախսել յուրաքանչյուր սենյակ, յուրաքանչյուր պահարան, յուրաքանչյուր նամակ ուսումնասիրելու վրա. նրանք ամեն ինչ ձայնագրել են», – նշել է Հարությունյանը։
Փաշինյանին իմպիչմենտի ենթարկելու փորձերը անհաջող էին, սակայն նրա և Առաքելական եկեղեցու միջև հարաբերությունները վատթարացել են։
Հունիսի 8-ին Փաշինյանը կոչ է արել եկեղեցու առաջնորդ Գարեգին Բ կաթողիկոսին հրաժարական տալ՝ նրան մեղադրելով կուսակրոնության երդմանը հակառակ երեխա ունենալու մեջ։ Եկեղեցին այդ ժամանակ հայտարարություն էր տարածել՝ մեղադրելով Փաշինյանին Հայաստանի «հոգևոր միասնությունը» խաթարելու համար։
Փաշինյանի պնդումը նոր զայրույթ է առաջացրել եկեղեցու հետևորդների շրջանում, այդ թվում՝ ռուսաստանաբնակ հայ միլիարդատեր Սամվել Կարապետյանի մոտ:
59-ամյա Կարապետյանը ձերբակալվել է հունիսի 18-ին՝ երկրում իշխանությունը զավթելու կոչ անելու մեղադրանքով։ Ավելի ուշ Փաշինյանը հայտարարել է, որ միլիարդատիրոջ էներգետիկ ընկերությունը՝ «Հայաստանի էլեկտրական ցանցերը», ազգայնացվելու է։
