Փաշինյանի հաջորդ քայլը հնարավոր ամեն բանի հանձնումն է՝ ամեն գնով 2026 թվականի ընտրություններում հաղթելու համար․ ռուսական մամուլ

Հայաստանի իշխանությունները շարունակում են իրենց «խաչակրաց արշավանքն» ընդդիմության՝ ներառյալ եկեղեցու, խորհրդարանի և խոշոր բիզնեսի ներկայացուցիչների դեմ։ Մասնավորապես, վարչապետ Նիկոլ Փաշինյանը խոստացել է «ազատել» Հայ Առաքելական եկեղեցին (ՀԱԵ) հավատքի և պետության հակառակորդներից, իսկ Քննչական կոմիտեն խուզարկություններ է անցկացրել միլիարդատեր Սամվել Կարապետյանի հետ կապված հասցեներում: Ընդդիմադիր պատգամավորներին սկսել են զրկել անձեռնմխելիությունից․ գրել է Независимая газета-ն։ 

Ինչպես նշվել է, ըստ փորձագետների, ընդդիմությունը չունի հանրային աջակցություն՝ փողոցային բողոքի ակցիաների միջոցով իր իրավունքները պաշտպանելու համար:

Չնայած կառավարության նկատմամբ լուրջ դժգոհությանը՝ մարդիկ պատրաստ չեն դուրս գալ բողոքի: Այնուամենայնիվ, վերջին բոլոր քաղաքային ընտրություններում Փաշինյանի «Քաղաքացիական պայմանագիր» կուսակցությունը պարտություն է կրել, ինչը շատ հստակ երևացել է Գյումրու և Փարաքարի վերջին ընտրություններում: Նույնիսկ Երևանում «Քաղաքացիական պայմանագիրը» կարողացել է քաղաքապետի պաշտոնը ստանալ միայն հետընտրական ինտրիգների միջոցով՝ չկարողանալով մեծամասնություն ստանալ Երևանի ավագանու ընտրություններում նույնիսկ իր արևմտամետ գործընկեր «Հանրապետություն» կուսակցության հետ կոալիցիայում: 

Московский Комсомолец-ը գրել է, որ եկեղեցու ղեկավարությունը վաղուց ոչ միայն դեմ է վարչապետի քաղաքականությանն, այլև բացահայտ քննադատում է նրան։ Ինչպես ընդգծել է կայքը, եկեղեցին հսկայական ազդեցություն ունի Հայաստանում։ Եվ հիմա այն հստակորեն դեմ է Փաշինյանի քաղաքականությանն՝ այն համարելով հայ ժողովրդի շահերի դավաճանություն։ Եվ Փաշինյանը պատրաստվում է շարունակել այս ճանապարհով։ Հաջորդը «Զանգեզուրի միջանցքի» բացումն է, Սահմանադրության փոփոխությունները և Ադրբեջանի հետ խաղաղության պայմանագրի ստորագրումը։ Այսինքն՝ ամեն բանի, ինչը հնարավոր է, հերթակակն հանձնում, և, վերջիվերջո, 2026 թվականին ընտրություններ են, և Փաշինյանը պետք է ինչ-որ կերպ հաղթի դրանցում։ 

Հետևաբար, նա ձգտում է վերահսկողություն հաստատել այնպիսի կարևոր պետական ինստիտուտի նկատմամբ, ինչպիսին եկեղեցին է։ Regnum-ն, իր հերթին, նշել է, որ ռազմական պարտությունների և դրանց պատճառած երկարատև ներքաղաքական ճգնաժամի ֆոնին՝ Հայաստանի կառավարությունը մեղադրանքներ է հնչեցնում Ռուսաստանի հասցեին՝ փորձելով իր սխալները բարդել Մոսկվայի վրա։