Իսրայելը համաձայն է Գազայի հարցում դիվանագիտական կարգավորման, բայց պատրաստ է նաև ուժի գործադրման․ Նեթանյահու

Իսրայելը համաձայն է Գազայի հատվածում հակամարտության դիվանագիտական կարգավորմանը. հայտարարել է Իսրայելի վարչապետ Բենիամին Նեթանյահուն` ԱՄՆ կատարած այցի ժամանակ։

Նա ընդգծել է` Իսրայելը համաձայն է անկլավում 60-օրյա հրադադարի, բայց պնդում է, որ պաղեստինյան արմատական ՀԱՄԱՍ շարժումն ապառազմականացվի և հեռանա իշխանությունից։ «Եթե դիվանագիտությունը չաշխատի, Իսրայելը մտադիր է այս խնդիրը լուծել ռազմական ճանապարհով»,-ասել է վարչապետը։ Նա նշել է, որ հուլիսի 9-ին ինքը ներկայացրել է այս դիրքորոշումը ԱՄՆ-ում Գազայում պատանդների հարազատների խմբի հետ հանդիպման ժամանակ։

«Մենք վճռականորեն տրամադրված ենք վերադարձնել բոլոր մարդկանց, ես նրանց ասացի այդ մասին։ Ես նրանց ասացի, որ հիմա մենք փորձում ենք ազատ արձակել պատանդների կեսին՝ կենդանի և մահացած, 60-օրյա հրադադարի դիմաց։ Այս հրադադարի սկզբում մենք կսկսենք բանակցություններ պատերազմի մշտական դադարեցման, այսինքն՝ մշտական հրադադարի վերաբերյալ։ Դրան հասնելու համար անհրաժեշտ է կատարել մեր կողմից առաջադրված նվազագույն պայմանները` ՀԱՄԱՍ-ը պետք էր վայր դնի զենքերը, Գազան` ապառազմականացվի, ՀԱՄԱՍ-ը այլևս չունի կառավարման կամ ռազմական ներուժ»,-ասել է նա։

Նեթանյահուի խոսքով՝ եթե դա հնարավոր լինի իրականացնել բանակցությունների միջոցով, ավելի լավ։ Եթե չհաջողվի 60 օր անց, ապա նրանք դա կանեն իրենց բանակի ուժով։