Ո՞վ կառաջնորդի և ովքե՞ր ներգրավված կլինեն «Մեր ձևով» շարժման մեջ. Սամվել Կարապետյանի եղբորորդին մանրամասներ է հայտնել

Կալանավորված գործարար Սամվել Կարապետյանի համախոհներն ու գործընկերները հայտարարել են «Մեր ձևով» կամավորական շարժման հիմնադրման մասին։ «Տաշիր» ընկերությունների խմբի փոխնախագահ Նարեկ Կարապետյանը հայտնել է, որ գործարար Սամվել Կարապետյանը կդառնա նոր ստեղծվող քաղաքական ուժի գաղափարական առաջնորդը, իսկ շարժման հիմնական նպատակը մարդկանց համախմբելն է՝ լավ, մեծ և բարի գործեր իրականացնելու գաղափարի շուրջ:

«Շարժումը մարդկանց ապաքաղաքական կամավոր միավորում է, որոնք պատրաստ են անձնուրաց ծառայել հանրօգուտ նպատակին։ Շարժման մասնակիցները կարող են լինել տարբեր մասնագիտությունների և հայացքների տեր մարդիկ, որոնք կարող են աշխատանքից ազատ ժամանակ մասնակցել շարժմանը։ Այն գործելու է 5 ուղղությամբ՝ 5 աշխատանքային խմբի միջոցով»,- ասել է Նարեկ Կարապետյանը։

Վերջինս հիշեցրել է, որ տարիներ առաջ գործող իշխանությունները ՀՀ քաղաքացիներին «հպարտ քաղաքացիներ» էին անվանում, իսկ այսօր նույն քաղաքացիներին ցանկանում են համոզել, որ զիջեն և համակերպվեն։

«Ուզում են համոզել, որ մեր ազգը «ձև» չունի, որ մեր երկրի զարգացումը ոչ թե ճիշտ և հետևողական աշխատանքի մեջ է, այլ հարևաններին հանձնվելու, ազգային խորհրդանիշները կորցնելու և չտարբերվելու․ այս պահին շարժումը կաշխատի հինգ ուղղություններով։ Առաջինը տնտեսականն է, որը կհամակարգի տնտեսագետ Աշոտ Ֆարսյանը։ Երկրորդ ուղղությունը՝ ժողովրդագրությունն ու երիտասարդ ընտանիքների համար ծրագրերի մշակումը. կգլխավորի միջազգայնագետ Արեգա Հովսեփյանը։Երրորդ ուղղությունը՝ արտաքին քաղաքականությունը, կհամակարգի միջազգայնագետ Արթուր Դանիելյանը։Չորրորդ ուղղությունը կհամակարգի Գոհար Գումաշյանը. նա կզբաղվի տաղանդավոր երեխաների և երիտասարդների համար կրթական ծրագրերով։Հինգերորդ ուղղությունը Հայ առաքելական եկեղեցու և ազգային արժեքների պահպանման խումբն է, որ կհամակարգի Ալեքսան Ալեքսանյանը»,- ներկայացրել է Կարապետյանը։

Նրա խոսքով՝ շարժման երրորդ փուլում նախատեսվում է նաև կուսակցություն հիմնել և մասնակցել առաջիկա ընտրություններին:

«Սամվել Կարապետյանը նաև ՀՀ քաղաքացի է, նա մեր գաղափարական առաջնորդն է։ ՀՀ քաղաքացիներն իրավունք ունեն մասնակցել որպես ընտրող և լինել առաջնորդ»,- ասել է նա։

Սամվել Կարապետյանի եղբորորդին նաև անդրադարձել է հարցին, թե Կարապետյանների կուսակցությունը կհամագործակցի՞ նախկին իշխանությունների հետ՝ հաշվի առնելով, որ ՀՀ երկրորդ և երրորդ նախագահների թիմակիցներն աջակցում են Կարապետյաններին։ Նա նշել է, որ հայացքները տարբեր են և այս պահին համագործակցություն չի նախատեսվում։

«Եթե մենք քաղաքական դաշտում տեսնեինք ուժ, որը կարտացոլեր մեր գաղափարները, հնարավոր է, որ այդ ժամանակ նայեինք այդ ուղղությամբ, բայց մենք չենք տեսնում։ Ցավոք, տնտեսական խորքային օրակարգով այսօր առաջարկ չկա։ Քաղաքական ուժերն այսօր մեր հասարակությանը «կերակրում են» քաղաքական մոտիվներով, բայց դրանց ազդեցությունը մարդկանց վրա բավականին քիչ է։ Այդ պատճառով մեր շարժումը կոչվում է «Մեր ձևով», այսինքն՝ ուրիշի ձևով չէ»,- նշել է Նարեկ Կարապետյանը։

«Մեր ձևով» շարժման համակարգողը նկատել է, որ ՀՀ հասարակական և քաղաքական կյանքում հասել են մի կետի, երբ մեր ժողովրդի սպասելիքները չեն բավարարվում։ Նրա խոսքով՝ առկա հասարակական և քաղաքական խմբերը, կենտրոնանալով իրար հանդեպ ատելություն քարոզելու վրա, մեր ժողովրդի մեջ հակասություններ են սերմանում։

«Որքան ավելի շատ են հակասություններն ու ատելությունը, այնքան ավելի անհաջող ընթացք են ունենում մեր գործերը։ Այստեղ կարևոր դեր ունի իշխանության գործելաոճը. մարդիկ, ցավոք, չտրանսֆորմացվեցին ընդդիմադիր դեղին մամուլի խմբագրից պետական միասնական գործչի, ինչը մեր հասարակությունը կողջուներ։ Ընդդիմության ատելությունն էլ, որն առաջացել է անարդարություններից, խանգարում է իրավիճակին նայել սթափ և ոչ էմոցիոնալ»,- նշել է նա։