Պետերբուրգի ՀՀ հյուպատոսարանում մահացած են գտել հետախուզվող Բորիս Ավագյանին
Սանկտ Պետերբուրգում ՀՀ հյուպատոսության շենքում մահացած են գտել Արցախի Հանրապետության նախագահի հատուկ հանձնարարությունների գծով նախկին ներկայացուցիչ Բորիս Ավագյանին․ հայտնում է Mash տելեգրամյան ալիքը։
Տելեգրամյան ալիքների հաղորդմամբ՝ Ավագյանը փակվել է Սանկտ Պետերբուրգում գտնվող Հայաստանի հյուպատոսության զուգարանում, որտեղ էլ ինքնասպան է եղել։
ՌԴ արտակարգ իրավիճակների նախարարության աշխատակիցները ստիպված են եղել դուռը բացել, ինչից հետո գտել են նրա մարմինը։
Հիշեցնենք, որ երեկ «Փաստինֆոյի» հետ կապ է հաստատել Բորիս Ավագյանը՝ հայտնելով, որ գտնվում է Սանկտ Պետերբուրգի ՀՀ հյուպատոսարանում։
«Վերջին 1 ամսվա ընթացքում ՌԴ հատուկ ոստիկանության աշխատակիցները ձերբակալել են, տարել ոստիկանություն, փաստաթղթեր ստուգելու, քանի որ Հայաստանը հետախուզում է հայտարարել իմ նկատմամբ։ Ես կամավոր ցանկանում եմ, որ ինձ արտահանձնեն Հայաստանին»,-ասել է նա։
Հարցին, թե Հայաստանում իր նկատմամբ քրեական հետապնդում է հայտարարված՝ մտավախություն չունի՞, որ այստեղ իրեն ձերբակալություն է սպասվում՝ Ավագյանն ասել է, որ իր նպատակը հենց դա է։ «Թող ձերբակալեն ու քննություն իրականացնեն, հետո դատարանը կորոշի՝ մեղավոր եմ, թե ոչ»,-հայտնել է Ավագյանը։
